“Sonra da bizə deyirlər ki, gəlin bizə inteqrasiya edin. Mən bir dəfə demişəm, hələ Avropada o iqtisadi böhran baş alıb gedəndə dedim ki, biz haraya inteqrasiya etməliyik, böhrana? Haraya inteqrasiya etməliyik, ”Stop İslam!" deyənlərə? Haraya inteqrasiya etməliyik, qadınla kişi arasında fərq görməyənə? Mən daha dərinə getmək istəmirəm. Biz qətiyyən oraya inteqrasiya etməyəcəyik".
Bu fikirləri prezident İlham Əliyev BDU-nun 100 illiyi ilə bağlı tədbirdə səsləndirmişdi.
Ölkə başçısı ifadələrində heç də Avropa ilə siyasi və iqtisadi əməkdaşlığı nəzərdə tutmurdu. Söhbət Qərb cəmiyyətində qəbul edilmiş və bizə yad görünən mental qaydalardan, qeyri-ənənəvi cərəyanlar və tendensiyalardan, avropalıların sosial həyatından gedir. Prezident Azərbaycanın bir Şərq və müsəlman ölkəsi olduğuna, bu regionun öz mədəni dəyərlərinə malik olmasına işarə vururdu.
Yəni biz avropalıların həyat tərzini yaşamırıq, öz yazılmamış əxlaq qanunlarımız, mental adətlərimiz, İslama söykənən baxışlarımız, bir fransız, yaxud ingilis ailələrindən seçilən ailə institutumuz var. Həmçinin homoseksuallığın inkişafı, həmcinslərin evliliyi, islamfobiyanın kampaniyaya çevrilməsi hallarının yolverilməzliyinə diqqət çəkirdi və Azərbaycanın Avropaya bu mənada inteqrasiya etməyəcəyini söyləyirdi.
Başqa sözlə, biz nə Qərbin təhsil və texnologiya yeniliklərindən və siyasi-iqtisadi proqramlarından imtina edirik, nə də demokratiyaya və insan haqlarına münasibətdən danışmırıq. Necə ki, klassiklərimizdən Mirzə Fətəli Axundov “Müsyö Jordan həkimi-nəbatət və Dərviş Məstəli şah cadükani-müşkin” pyesində avropalılar haqda yazırdı: “Bizlərdə çox arvad almaq dəbdi, onlarda çox kişi almaq”.
Doğurdan da, Azərbaycan mədəni inteqrasiyada Avropaya doğru istiqamət almalıdırmı?
Yeniavaz.com xəbər verir ki, Xalq artisti Rasim Balayev “Yeni Müsavat”a bildirdi ki, dövlət başçısının fikirləri həqiqətdir. Onun sözlərinə görə, dünyada elə qeyri-ənənəvi meyllər əmələ gəlib ki, normal insan ağlı bunu qəbul edə bilməz: “Prezident düz deyir də... Dünyanın axırıdır ki, kişi kişi ilə toy edir. Mən Quranı oxumuşam, axirətin əməlləri orada sadalanıb. Belə hərəkətlər bizə yaddır. Biz onu niyə nümunə etməliyik?”
R.Balayev bu “dəyər”lərin təbliğinin əleyhinədir və efirə çıxan bəzi adamların qarşısının alınmasını vacib sayır: “Şübhəli adamlar efirə çıxırlar. Televiziya rəhbərləri bunun qabağını almalıdır. Hər şeyin öz həddi var. Bir millət kimi öz xasiyyətimiz, ənənələrimiz var. Allah məsləhət bilsəydi, elə hamını, bizi də ingilis, rus yaradardı. Hər xalqın öz əxlaq normaları, yaşayış tərzi var. Azərbaycan xalqının öz adət-ənənələri var. Bizim öz ailə dəyərlərimiz avropalılardan fərqlidir. Bizdə ailədə kişinin fikri əsasdır. Bu da olmayanda ailədə başqa problemlər meydana çıxır”.
Deputat Aqiyə Naxçıvanlı isə BBC-yə şərhində söyləyib ki, Azərbaycanda hərdən səhvən dünyaya inteqrasiya adı ilə Avropa dəyərləri gətirilib cəmiyyətimizə şamil edilir.
“Bizim özümüzün dədə-babadan gələn adət-ənənəmiz var. Cənab prezident onları göstərdi ki, bizdə ağsaqqala, ağbirçəyə, böyüyə hörmət adətləri var və bu, başqa millətlərdə yoxdur” - Aqiyə Naxçıvanlı deyib.
O deyib ki, Azərbaycanda şübhəsiz ki, qadın kişi bərabərliyi var, amma bizdə onun Azərbaycan modelidir. Deputat bildirib ki, milli mentalitet və adətlər qorunmalıdır və prezidentin çıxışı da bunu nəzərdə tutur:
“Biz bu bərabərlikdən danışırıq, daha demirik ki, qadın əlinə nəsə alıb kişini döysün və desin ki, mənim də hüquqlarım kişiylə bərabərdir. Başqa millətlərdə kişi qadın, qadın kişi ola bilir, bizdə belə şeylər yoxdur. İlham Əliyevin fikirlərində ziddiyyət yoxdur. Biz dünyaya inteqrasiya olmalıyıq, amma öz dəyərlərimizi itirmədən inteqrasiya olunmalıyıq”.
Tətbiqimizi yükləyə bilərsiniz
