Birlikdə yemək yemək sosial münasibətləri gücləndirməklə yanaşı, insanın psixoloji və fiziki sağlamlığına da müsbət təsir göstərə bilər.
Yeniavaz.com BBC-yə istinadla xəbər verir ki, başqaları ilə müntəzəm şəkildə yemək yeyən insanlarda depressiya riski daha aşağı və emosional rifah göstəriciləri daha yüksək ola bilər.
Çinin Çjetszyan əyalətində Xəstəliklərə Nəzarət və Profilaktika Mərkəzinin 60 yaşdan yuxarı 9361 qadın arasında apardığı araşdırmada yemək zamanı masa ətrafında olan insanların sayının depressiya riski ilə əlaqəli olduğu müəyyən edilib. Nəticə, iştirakçıların gəlir səviyyəsi, ümumi sağlamlığı və tək yaşayıb-yaşamaması kimi amillər nəzərə alındıqdan sonra da dəyişməyib.
Tokioda aparılan başqa bir araşdırmaya görə isə ailələri ilə yaşayan, lakin tək yemək yeyən 65-74 yaşlı insanların depressiv simptomlarla qarşılaşma ehtimalı başqaları ilə müntəzəm yemək yeyənlərlə müqayisədə daha yüksək olub.
Oksford Universitetinin professoru Yan Emmanuel De Neve və həmkarlarının Dünya Xoşbəxtlik Hesabatı çərçivəsində apardığı araşdırmada da insanların başqaları ilə paylaşdığı yeməklərin sayı artdıqca həyat məmnuniyyəti və emosional rifah göstəricilərinin yüksəldiyi müəyyənləşdirilib.
Mütəxəssislər birlikdə yeməyin beyinə də müsbət təsir göstərə biləcəyini bildirirlər. Yapon alimlərinin araşdırmasına görə, müntəzəm olaraq tək yemək yeyən insanlarda beyin həcminin azalması, o cümlədən yaddaş və idrak funksiyalarında mühüm rol oynayan bəzi bölgələrdə dəyişikliklər müşahidə olunub. Tədqiqatçılar bunun sosial əlaqələrin azalması və stresslə bağlı ola biləcəyini düşünürlər.
Bundan başqa, Pensilvaniya Universitetinin tədqiqatçıları insanların başqa birinin yanında yedikləri şokoladı daha dadlı hesab etdiklərini müəyyən ediblər. Oksford Universitetinin bioloji antropoloqu Robin Dunbar isə birlikdə qidalanmanın “endorfin” sistemini aktivləşdirərək insanlar arasında bağlılıq hissini gücləndirə biləcəyini irəli sürür.
Dünya Xoşbəxtlik Hesabatına görə, birlikdə yemək vərdişi ölkələr arasında ciddi fərqlənir. Orta hesabla yaponlar həftədə dörd dəfədən az, britaniyalılar və amerikalılar 7-8 dəfə, italyanlar isə təxminən 9 dəfə başqaları ilə birlikdə yemək yeyirlər.
Mütəxəssislər hesab edirlər ki, müasir həyatın yaratdığı tənhalığa qarşı ən sadə addımlardan biri yaxınları, dostları və tanışları yeməyə dəvət etməkdir. Araşdırmalar insanların belə dəvətlərə düşündüyümüzdən daha açıq olduğunu göstərir.
Beləliklə, birlikdə yemək yalnız süfrə arxasında vaxt keçirmək deyil, həm də sosial əlaqələri gücləndirən, emosional rifaha və ümumi sağlamlığa müsbət təsir göstərə bilən qədim bir vərdiş kimi qiymətləndirilir.
Tətbiqimizi yükləyə bilərsiniz
