“RR şirkətlər qrupu” 207 min manatlıq borcunu ödəyə bilmir?

Azərbaycanda kənd təsərrüfatı, tikinti, ticarət, logistika, obyektlərin icarəsi və istismarı istiqamətində fəaliyyət göstərən tanınmış şirkətlər qrupuna – “RR Group of Companies” MMC-yə (VÖEN – 1502392011) bağlı olan “RR İnşaat” MMC-nin (VÖEN – 1501776111) və “R+R Compani” MMC-nin (VÖEN – 1401007181) dövlət büdcəsinə böyük həcmdə vergi borcu yaranıb.
Yeniavaz.com açıqlanan rəsmi məlumatlara istinadən bildirir ki, “RR İnşaat” MMC-nin 22 sentyabr 2026-cı il tarixinə olan vergi borcu 204 min 381 manat 66 qəpik, “R+R Compani” MMC-nin vergi borcu isə 3 min 130 manat 20 qəpik təşkil edir.
Məlumat üçün bildirək ki, nizamnamə kapitalı 40 manat olan “RR İnşaat” MMC-nin qanuni təmsilçisi Əsgərov Rüstəm İbrahim oğlu, nizamnamə kapitalı 20 manat olan “R+R Compani” MMC-nin qanuni təmsilçisi isə Quliyev Fizuli Əli oğludur. “RR İnşaat” MMC və “R+R Compani” MMC ilə eyni hüquqi ünvanda – “Nərimanov rayonu, Qədim İrəvani, ev 9”da yerləşən “RR Group of Companies” MMC-nin qanuni təmsilçisi Əliyev İlham Zakir oğludur.
Şirkətin rəsmi saytında qeyd olunur ki, qrupun təsisçisi Rafiq Qarayevdir. İdarə heyətinin üzvü kimi “RR İnvestment” MMC-nin (VÖEN – 5101066671) direktoru Quliyev Fizuli Əli oğlu ilə “Qarabağ Aqro 44” MMC-nin (VÖEN – 3201617231) direktoru Qarayeva Taliyyə İbrahim qızı göstərilir.
Adı keçən iki şirkətin hüquqi ünvanı Ağdam rayonunun Xaçındərbətli kəndində yerləşir. 2 il əvvəl “Qarabağ Aqro 44” MMC-yə Ağdam Sənaye Parkının rezidenti statusu verilib. Bildirilib ki, müəssisədə ət və ət məhsulları istehsalı həyata keçiriləcək. İnvestisiya dəyəri 1,4 milyon manat olan müəssisədə 20 nəfər işlə təmin ediləcək.

Elnur Əli