Bu superyapışqan suda da davam gətirir...

Alimlər suda bir neçə il möhkəmliyini qoruyan sualtı superyapışqan kəşf ediblər.
Yeniavaz.com xəbər verir ki, tədqiqatın nəticələri “Nature Communications” jurnalında dərc edilib.
Belə ki, su altında işləyərkən ənənəvi yapışqanların əsas problemi səthi örtən su təbəqəsidir və bu, yapışqanın etibarlı şəkildə yapışmasına mane olur. Bundan əlavə, su, yapışqanın keyfiyyətini azalda, həmçinin onu yuyub apara bilər.
BP16TPB adlanan yeni material dimetil sulfoksidlə qarışdırılıb. Su ilə təmasda olduqda, yapışqanın komponentləri yenidən düzülür və suya davamlı bir quruluş əmələ gətirir. Bu proses hidrogen rabitələrini və molekulyar seqmentlər arasında qarşılıqlı təsiri əhatə edir.
Tədqiqatçıların sözlərinə görə, burada Maranqoni effekti əlavə rol oynayır. Belə ki, səth gərginliyindəki fərqlər materialın səth boyunca yayılmasına kömək edir. Eyni zamanda, yapışqanın hidrofob xüsusiyyətləri onun suyun təmas zonasından sıxışdırılmasına imkan verir.
İlk testlər keramika, epoksid qatranı və plastik üzərində aparılıb. Su altında cəmi 10 saniyə qaldıqdan sonra yapışqanın möhkəmliyi 1,1 MPa-ya çatıb ki, bu da tədqiqatçıların fikrincə, ənənəvi sualtı yapışqanlardan xeyli yüksəkdir.
Material həmçinin yüksək davamlılıq nümayiş etdirib. Həmçinin testlərdən birində üç ildən çox suda qalan yapışqan 2 kq yükə davam gətirib. Bundan əlavə, yapışqan səkkiz qopma və yenidən bərkidilmə dövründən sonra öz xüsusiyyətlərini qoruyub. Tərkib turşu, qələvi və duzlu məhlullar üçün də davamlılığını davam etdirib, lakin 70°C-dən yuxarı temperaturda sabitliyini itirib.
Müəlliflərin fikrincə, material okean infrastrukturu da daxil olmaqla, sualtı obyektlərin təmiri və saxlanması üçün faydalı ola bilər. Növbəti sınaqlar texnologiyanın praktik istifadə üçün uyğunluğunu nümayiş etdirməlidir.