“Neft qiymətləri qısa müddətdə pik həddə çatacaq” – Kris Rayt

Neft qiymətləri qısa müddətdə pik həddə çatacaq, lakin daha sonra azalma mərhələsinə keçəcək.
Yeniavaz.com xəbər verir ki, bunu ABŞ-nin energetika naziri Kris Rayt bildirib.
Nazirin sözlərinə görə, qiymətlərin düşməsi əsasən Hörmüz boğazı üzərindən gəmiçiliyin bərpası ilə bağlı olacaq. O qeyd edib ki, boğazda naviqasiya tam bərpa olunana qədər enerji daşıyıcılarının qiymətləri yüksək səviyyədə qalmağa davam edəcək.
Eyni zamanda, ABŞ Prezidenti Donald Tramp yüksək neft və benzin qiymətlərinin ölkədə siyasi proseslərə təsir edə biləcəyini etiraf edib. Onun sözlərinə görə, bahalaşma noyabr ayında keçiriləcək aralıq seçkilərə qədər davam edə bilər. Bu açıqlama analitiklərin enerji bazarının sabitləşməsi üçün ən azı 4–5 ay vaxt tələb olunduğu barədə proqnozları ilə üst-üstə düşür.
Nazir həmçinin Venesueladakı enerji sektoruna toxunaraq bildirib ki, bu ölkədə neft hasilatı artıq 25% artıb. ABŞ-nin “Chevron” şirkəti burada ağır neft hasilatının genişləndirilməsi və aktivlərin mübadiləsini nəzərdə tutan yeni müqavilələr imzalayıb. Venesuela bazarında hasilatın artırılması uzunmüddətli perspektivdə qlobal enerji qiymətlərinin sabitləşməsinə töhfə verə bilər.