ABŞ-nin Massaçusets ştatında qripə yoluxma hallarının kəskin artımı qeydə alınıb və bu, mövsüm ərzində uşaqlar arasında ilk ölüm dalğası ilə müşayiət olunur.
Yeniavaz.com xəbər verir ki, bu barədə “Medical Xpress” məlumat yayıb.
Bildirilib ki, 2026-cı ilin yanvar ayının əvvəlinə olan məlumata görə, ştatda qriplə əlaqəli dörd ölüm halı təsdiqlənib.
“Onların arasında Bostonda iki yaşından kiçik iki uşaq da var ki, bunlar şəhərdə 2013-cü ildən bəri qriplə bağlı ilk ölüm hallarıdır.
Massaçusets A virusunun yeni variantının yayılması fonunda qeyri-adi dərəcədə ağır qrip dalğası yaşayır ki, bu da təsdiqlənmiş yoluxma hallarının əhəmiyyətli dərəcədə artmasına səbəb olub. Yoluxanların sayı sürətlə artır və bir çox bölgələrdə hospitalizasiyalar 2025-ci ilin dekabr ayının son həftələri ilə müqayisədə demək olar ki, üç dəfə artıb”, - nəşr yazır.
Qeyd olunub ki,Dövlət İctimai Səhiyyə Departamentinin məlumatları Massaçusetsdə qrip aktivliyinin “çox yüksək” olduğunu göstərir:
“Qriplə əlaqəli simptomlar və ağırlaşmalar səbəbindən təcili yardım şöbələrinə müraciətlərin sayı artmaqda davam edir. Xüsusilə azyaşlı uşaqlar arasında ağır xəstəlik hallarının və hospitalizasiyaların artması diqqət çəkir.
Mütəxəssislər vurğulayırlar ki, yeni variantlara qarşı peyvəndin nisbətən aşağı effektivliyinə baxmayaraq, peyvəndləmə ağır fəsadlardan, hospitalizasiyalardan və ölümdən qorunmanın əsas vasitəsi olaraq qalır. Boston Səhiyyə Komissiyası və digər yerli qurumlar peyvəndlənmə əhatəsini genişləndirmək məqsədilə, xüsusilə altı aylıq və daha böyük uşaqlar arasında, əlavə pulsuz peyvənd klinikaları açıb”.
Tətbiqimizi yükləyə bilərsiniz
