Mayo Klinikasının alimləri “zombi-hüceyrələr” adlandırılan hüceyrələrin iltihaba necə töhfə verdiyini və qaraciyərin yağlanmasının ağır forması olan, maddələr mübadiləsi ilə əlaqəli steatohepatitin (MASH) inkişafını necə sürətləndirdiyini müəyyən ediblər.
Yeniavaz.com xəbər verir ki, araşdırmanın nəticələri “Nature Communications” jurnalında dərc olunub.
Bildirilir ki, xəstəlik piylənmənin artması fonunda bütün dünyada getdikcə daha geniş yayılır və artıq qaraciyər transplantasiyasının aparıcı səbəblərindən birinə çevrilib.
“Tədqiqatlar göstərir ki, MASH-in əsas xüsusiyyətləri qaraciyərin çapıqlaşması və iltihabdır. Müalicə olunmadıqda bu xəstəlik qaraciyər xərçənginə çevrilə bilər. Məhz buna görə onun yaranma mexanizmlərini anlamaq son dərəcə vacibdir”, — deyə tədqiqatın aparıcı müəllifi Stella Viktorrelini bildirib.
“Zombi-hüceyrələr” bölünməyi dayandırmış, lakin canlı qalan və toxumalara zərər verən, iltihab yaradan maddələr ifraz etməyə başlayan qocalmış hüceyrələrdir. Gənc yaşlarda immun sistemi bu cür hüceyrələri effektiv şəkildə aradan qaldırır, lakin yaş artdıqca onlar orqanizmdə toplanır və xroniki iltihab mənbəyinə çevrilir.
Araşdırmanın nəticələri “zombi-hüceyrələrin” yığılmasının niyə yaşla bağlı xəstəliklərlə əlaqəli olduğunu izah etməyə kömək edib və MASH ilə yanaşı xroniki iltihabla bağlı digər vəziyyətlərin müalicəsi üçün yeni terapevtik hədəfləri önə çıxarıb. Alimlər hesab edirlər ki, əgər qocalmış hüceyrələrin zərərli təsirlərini zəiflətmək mümkün olsa, bu, qaraciyərin iltihabi xəstəliklərinin və yaşla əlaqəli digər patologiyaların qarşısını almağa və ya onların inkişafını ləngitməyə kömək edə bilər.
Tətbiqimizi yükləyə bilərsiniz
