Lukaşenko özünü “gedən prezident” adlandırdı

Belarus Prezidenti Aleksandr Lukaşenko yığılan problemləri gələcək nəsillərə ötürmək istəmədiyini bildirib.
Yeniavaz.com xəbər verir ki, bu barədə prezident “Newsmax TV” müsahibəsində deyib. 
Siyasətçi hesab edir ki, hər nəsil öz problemləri ilə məşğul olmalıdır. O, Minsk və Vaşinqton arasında münasibətləri yaxşılaşdırmaq və 2020-ci ildə ölkədə hökumət əleyhinə etirazlardan sonra yaranan fikir ayrılıqlarını aradan qaldırmaq istəyir:
“Bizim nəslin, ABŞ Prezidenti Donald Trampın və Lukaşenkonun problemləri var və biz onları həll etməliyik”.
Ölkə başçısı qeyd edib ki, o, özünü “gedən prezident” hesab edir.
Həmin müsahibədə Lukaşenko özünü Trampın prezidentliyə namizədliyini açıq şəkildə dəstəkləyən yeganə siyasətçi adlandırıb. Dövlət başçısı amerikalı həmkarını güclü fiqur hesab edir və hesab edir ki, ABŞ liderinin təşəbbüsü ilə Rusiya, Çin, Yaponiya, ABŞ və Hindistandan ibarət blok yaradılarsa, dünya tamamilə fərqli olacaq. Lukaşenko Trampın kor-koranə tərəfdarı olmadığını da vurğulayıb.