Bahalı diş fırçası dişlərinizi daha yaxşı təmizləmir

Hollandiyalı diş həkimi-parodontoloq Tim Tomasen müəyyən edib ki, dişlərin sağlamlığına ən böyük töhfəni bahalı cihazlar deyil, sadə, gündəlik vərdişlər verir.
Yeniavaz.com xəbər verir ki, bu barədə Amsterdam Universitetinin (UA) rəsmi veb-səhifəsində məlumat dərc olunub.
Bildirilib ki, alim onlarla klinik tədqiqatı təhlil edib, müxtəlif növ diş fırçalarının effektivliyini müqayisə edib və təmizləmə müddətinin dişlərin və diş ətlərinin vəziyyətinə necə təsir etdiyini araşdırıb.
Qeyd olunub ki, bu gün ağız boşluğunun kariyes və diş əti iltihabı kimi xəstəlikləri demək olar ki, 3,5 milyard insana təsir edir. Bu problemlərin əsas səbəbi çox vaxt diş ərpidir, buna görə də stomatoloqların əsas tövsiyəsi dişlərin müntəzəm təmizlənməsi olaraq qalır.
Bəs “dişləri yaxşı təmizləmək” dedikdə nə nəzərdə tutulur?
Tomasen müəyyən edib ki, qabaqcıl texnologiyaların vacibliyi barədə geniş yayılmış təsəvvürlər xeyli dərəcədə şişirdilib. Onun sözlərinə görə, real həyatda elektrik diş fırçalarının müxtəlif növləri arasındakı fərqlər minimaldır. Bu isə əsas amilin cihazın özü deyil, ondan istifadə edən şəxs olduğunu göstərir.
Alim təsdiqləyib ki, elektrik diş fırçaları diş ərpini adi diş fırçalarına nisbətən daha yaxşı təmizləyir. Lakin iki əsas növ — fırlanan və səs (sonik) diş fırçaları arasında praktiki olaraq heç bir fərq yoxdur. Tomasen hesab edir ki, istehsalçılar daha bahalı modellər yaratmağa deyil, insanların təmizləmə texnikasını yaxşılaşdırmağa kömək edəcək əlçatan dizayna və maarifləndirici proqramlara sərmayə qoymalıdırlar.
Alim, həmçinin müxtəlif ölkələrin stomatoloji assosiasiyalarının tövsiyələrini araşdırıb. Məlum olub ki, təşkilatların yalnız üçdə biri diş qulluğu ilə bağlı ətraflı və aydın təlimatlar təqdim edir. Tomasen vurğulayıb ki, əlçatan və praktik məsləhətlər uğurlu profilaktika üçün son dərəcə vacibdir. O, müxtəlif yaş qruplarına, sosial şəraitə və maliyyə imkanlarına uyğunlaşdırılmış, sübutlara əsaslanan milli tövsiyələr sisteminin yaradılmasını müdafiə edir.
O ümid edir ki, araşdırması elmi sübutlarla gündəlik stomatoloji praktika arasında körpü qurmağa kömək edəcək.