“Kızılelma” dünya aviasiya tarixində ilkə imza atıb

Türkiyənin yeni nəsil pilotsuz döyüş təyyarəsi “Bayraktar Kızılelma” dünya aviasiya tarixində mühüm nailiyyət əldə edib.
Yeniavaz.com xəbər verir ki, “Baykar” şirkətinin məlumatına görə, “Kızılelma” ilk dəfə olaraq görüş məsafəsindən kənarda yerləşən sürətli reaktiv hədəfi hava-hava raketi ilə məhv edən pilotsuz döyüş aparatı olub.
Sınaq Türkiyənin Sinop bölgəsində yerləşən poliqonda həyata keçirilib. Baykar bildirir ki, “Kızılelma” beş F-16 qırıcısından ibarət qrupla birgə uçuş zamanı hədəfi Murad AESA radarı vasitəsilə aşkarlayıb, onu izləyib və “Gökdoğan” hava-hava raketi ilə vurub. Şirkətin açıqlamasında qeyd olunur ki, raket hədəfi “birbaşa dəqiqliklə” məhv edib.
“Bayraktar Kızılelma” ilk dəfə 2022-ci ilin avqustunda Samsunda keçirilən “Teknofest” aerokosmik sərgisində təqdim olunub. Layihə Türkiyənin MIUS (Muharip İnsansız Uçak Sistemi) döyüş İHA proqramı çərçivəsində hazırlanır.
Təyyarənin ümumi uçuş kütləsi təxminən 6 ton, bunun 2 tonu isə faydalı yük daşıma qabiliyyətidir. “Kızılelma” 12 km hündürlükdə 5–6 saat fasiləsiz uçuş edə bilir.