İnsanabənzər robotların dəyəri 2035-ci ilə qədər 70% azalacaq − “Yicai”

Təchizat zəncirinin inkişafı və miqyas iqtisadiyyatı sayəsində insanabənzər robotların istehsalının dəyəri 10 il ərzində 60-70% azala bilər.
Yeniavaz.com xəbər verir ki, bu barədə “Bain & Company” konsaltinq şirkətinin hesabatına istinadən “Yicai” məlumat yayıb.
Analitiklərin hesablamalarına görə, 2035-ci ilə qədər vahid “android”in yaradılmasının dəyəri 40-50 min dollardan 10-20 min dollara qədər azalacaq. Rolik vintlər və altı oxlu qüvvə sensorları robot istehsalı xərclərinin təxminən 40%-ni təşkil edir. Şirkət proqnozlaşdırır ki, bu komponentlər daha çox şirkət onları istehsal etməyə başladığı üçün qiymətləri 70-80% ucuzlaşacaq. Analitiklər hesab edirlər ki, robotistlər 5-10 il ərzində süni intellekt çipləri, batareyalar və istilik idarəetmə sistemlərinin yaradılmasında irəliləyişlər edəcəklər.
“Bain & Company” direktoru Jao Tiançen nəşrə bildirib ki, Çin çox güman ki, sənayeyə rəhbərlik edəcək. Bu, genişmiqyaslı istehsal gücü, geniş təchizat zənciri və Çində sürətlə inkişaf edən texnologiyalar sayəsində baş verəcək.
Şirkət yaxın 5-10 il ərzində insanabənzər robot sənayesinin “qızıl” inkişaf dövrünə qədəm qoyacağına inanır. 2035-ci ilə qədər bazar illik satışları təxminən 6 milyon ədəd olmaqla 120 milyard dolları keçəcək. Daha optimist ssenaridə satışlar 10 milyon ədədi keçə, bazarın həcmi isə 260 milyard dollara çata bilər.