“Meta” saxta sxemləri və qadağan olunmuş məhsulları təbliğ edən reklamlar hesabına hər il milyardlarla dollar gəlir əldə edir.
Yeniavaz.com xəbər verir ki, bu barədə “Reuters” məlumat yayıb.
“Reuters” şirkətin daxili sənədlərinə istinadən verdiyi məlumata görə, “Meta”nın sosial media platformalarında (“Facebook”, “Instagram” və “WhatsApp”) gündə 15 milyarda qədər saxta və ya qadağan olunmuş məhsullarla bağlı reklam nümayiş olunur. Şirkət bu reklamların sayəsində illik gəlirinin təxminən 10%-ini – 16 milyard dollara qədər qazanır.
2021-ci ildən bəri aparılan daxili təhlillər göstərir ki, “Meta”nın avtomatlaşdırılmış sistemləri “yüksək riskli” reklamlardan hər il təxminən 7 milyard dollar gəlir gətirir. Sənədlərdən aydın olur ki, şirkət yalnız 95% əminliklə fırıldaqçılıq ehtimalı olan reklamverənləri bloklayır, bu da çoxsaylı saxta kampaniyaların sistemdən yan keçməsinə şərait yaradır. Üstəlik, saxtakarlıqda şübhəli hesab edilən reklamçılardan “Meta” əlavə tariflər alır.
“Meta”nın fərdiləşdirmə alqoritmləri istifadəçilərin maraqlarına əsaslandığı üçün, saxta reklamlara klikləyən şəxslər bu cür məzmunla daha tez-tez qarşılaşırlar. “Meta”nın keçmiş əməkdaşı, fırıldaqçılıq üzrə mütəxəssis Sandeep Abraham bildirib ki, şirkətin belə mənbələrdən ödəniş qəbul etməsi texnologiya sektorunda tənzimləyici nəzarətin zəifliyini göstərir: “Əgər banklar fırıldaqçılıqdan qazanc əldə etdikdə cəzalandırılırsa, texnologiya şirkətləri üçün də eyni standartlar tətbiq edilməlidir”.
“Meta” sözçüsü Andy Stone iddiaları “seçmə və təhrif olunmuş” adlandırıb və şirkətin saxta reklamlarla mübarizə apardığını bildirib. O, daxili təxminlərin “həddindən artıq geniş və qeyri-dəqiq” olduğunu, faktiki göstəricilərin isə daha aşağı olduğunu söyləyib. “Meta”nın məlumatına görə, son 18 ay ərzində saxta reklamlarla bağlı istifadəçi şikayətləri 58% azalıb, 2025-ci ildə isə 134 milyondan çox belə məzmun silinib.
“Reuters”in məlumatına görə, ABŞ Qiymətli Kağızlar və Birja Komissiyası (SEC) “Meta”nın saxta maliyyə sxemləri üçün reklam yerləşdirməsi ilə bağlı araşdırma aparır. Böyük Britaniyada tənzimləyicilər isə bildiriblər ki, 2023-cü ildə ödənişlə əlaqədar bütün fırıldaqçılıq hallarının 54%-i “Meta” platformaları ilə bağlı olub – bu, digər sosial media şirkətlərindən iki dəfə çoxdur.
“Meta”nın daxili planlarına görə, şirkət 2027-ci ilə qədər saxta və qadağan olunmuş reklamlardan əldə edilən gəlirin payını 5,8%-ə endirməyi hədəfləyir. Bununla belə, sənədlərdə “Meta”nın saxta reklam nəzarətini gücləndirməyin maliyyə baxımından bahalı olduğunu və bu xərclərin mümkün hökumət cəzaları ilə müqayisə olunduğu qeyd olunur. Şirkət saxta reklamlarla bağlı 1 milyard dollara qədər cərimə ilə üzləşə biləcəyini etiraf edib.
“Reuters”in təhlili “Meta”nın üç ildən çoxdur milyardlarla istifadəçini saxta investisiya, qeyri-qanuni qumar və əczaçılıq məhsulları ilə bağlı fırıldaqçılıq kampaniyalarına məruz qoyduğunu üzə çıxarır.
Murad Məmmədov
Tətbiqimizi yükləyə bilərsiniz
