İsrail Yəmənə zərbələr endirdi – Ölənlər var

İsrail ordusu Yəmənə yeni silsilə zərbələr endirib.
Yeniavaz.com xəbər verir ki, İsrail Müdafiə Qüvvələrinin məlumatına görə, zərbələrin hədəfi “Ənsar Allah” hərəkatının husi üsyançılarının Səna yaxınlığında və ölkənin şimalındakı Əl-Cəvf vilayətindəki hərbi obyektləri olub.
Hərəkatın sözçüsü Yəhya Sərianın məlumatına görə isə, İsrail Yəmənə hava hücumu zamanı yalnız mülki obyektlərə zərbə endirib.
Bildirilib ki, İsrail Yəmənin şimalındakı Əl-Cəvf əyalətində olan Mərkəzi bankın ofisinə hücum edib. Atışma nəticəsində bank işçiləri arasında yaralananlar var.
TASS-dakı mənbənin məlumatına görə, İsrail Hərbi Hava Qüvvələri husilərin Müdafiə Nazirliyinə və Sənadakı üsyançıların baş qərargahına da zərbələr endirib. Hücum nəticəsində ölən və yaralananlar var.
Həmçinin 2 yerli “26 Sentyabr” və “Yemen” qəzetlərinin ofisləri hədəfə alınıb.
Aviazərbələr nəticəsində azı 9 nəfər ölüb, 118 nəfər yaralanıb.