Xəbər verdiyimiz kimi, Cənubi koreyalı ifaçı, 2012-ci ildəki “Gangnam Style” hitinə görə məşhurlaşan PSY polis tərəfindən saxlanılıb.
Yeniavaz.com xəbər verir ki, “The Times” nəşrinin məlumatına görə, sənətçi sağlamlığın qorunması haqqında qanunu pozmaqda şübhəli bilinir və artıq Seul polisi araşdırmaya başlayıb.
Qeyd olunur ki, 47 yaşlı müğənni artıq üç ildir ki, meneceri də daxil olmaqla üçüncü şəxslər vasitəsilə məşhur psixotrop dərmanlar üçün reseptlər alır. Bu dərmanlar yuxusuzluq və depressiyanı aradan qaldırmaq üçün təyin olunur. Ancaq ifaçı özü bir dəfə də olsun tibb müəssisəsinə müraciət etməyib.
Qeyd edək ki, ittihamdan sonra hüquq-mühafizə orqanları ona dərman verən xəstəxanada axtarış aparıb və müvafiq sənədləri müsadirə ediblər. İfaçının həkimi isə bütün ittihamları inkar edir.
PSY-nin özü tərəfindən təsis edilmiş “P Nation” agentliyi hadisəyə reaksiya verib. Nümayəndələr qeyd ediblər ki, PSY həqiqətən də xroniki yuxu problemlərindən əziyyət çəkir və yuxugətirici dərmanları yalnız həkim təyinatı əsasında qəbul edir.
Əsl adı Pak Çe San olan PSY, “Gangnam Style” treki ilə məşhurlaşıb. Bu klip “YouTube” tarixində baxış sayına görə rekordçu olub: hazırda videoya 5 milyarddan çox baxış var. Həmçinin hit ABŞ, Böyük Britaniya, Kanada, Fransa və Almaniya da daxil olmaqla 30-dan çox ölkədə çartların zirvəsinə qalxıb və 2012-ci ildə “MTV Europe Music Award”da “Ən yaxşı viral hit” nominasiyasında mükafat qazanıb.
Tətbiqimizi yükləyə bilərsiniz
