ABŞ Milli Kəşfiyyat İdarəsi (MKİ) vətəndaş hüquqlarının lideri Martin Lüter Kinqin qətli ilə bağlı 230 min səhifədən çox sənədin məxfiliyini ləğv edib.
Yeniavaz.com xəbər verir ki, bu barədə iyulun 21-də ABŞ Milli Kəşfiyyatının direktoru Tulsi Qabbard məlumat verib.
Sənədlər ABŞ Milli Arxivlər və Sənədlər İdarəsinin saytında dərc edilib.
“Bu sənədlərdə Martin Lüter Kinqin qətli ilə bağlı FTB-nin təhqiqatı, potensial sübutların müzakirələri, istintaqın gedişatını əks etdirən daxili FTB qeydləri və MKİ hesabatları var”, - Qabbard bildirib.
Onun sözlərinə görə, 1977-ci ildə məhkəmə qərarı ilə möhürlənmiş, buraxılmış bəzi sənədlər əvvəllər rəqəmsallaşdırılmayıb.
Qeyd edək ki, Martin Lüter Kinq 4 aprel 1968-ci ildə Memfisdə sui-qəsd nəticəsində öldürülüb. Rəsmi versiyaya görə, qətli tək silahlı şəxs törədib və heç bir sui-qəsd əlaməti olmayıb.
Xatırladaq ki, mart ayında ABŞ Milli Arxivi prezident Con Kennediyə, onun qardaşı Robert Kennediyə və Martin Lüter Kinqə qarşı sui-qəsd cəhdləri ilə bağlı məxfi sənədləri açıqlayıb.
Tətbiqimizi yükləyə bilərsiniz
