“Google” öz əməliyyat sistemlərinin inkişafı sahəsində mühüm addım atıb.
Yeniavaz.com xəbər verir ki, şirkət “ChromeOS” və “Android” əməliyyat sistemlərini birləşdirərək vahid platformaya çevirmək qərarını rəsmi şəkildə açıqlayıb.
Bu barədə “Android”in rəhbəri Samir Samat məlumat verib və bildirib ki, yeni sistem həm mobil cihazlar, həm də noutbuklar üçün optimallaşdırılacaq.
Birləşmənin səbəbləri
“ChromeOS” və “Android”in birləşəcəyi barədə söz-söhbətlər artıq uzun müddətdir mövcud idi. İndi bu məlumat rəsmən təsdiqlənib. “Android” artıq böyük ekranlı cihazlara uyğunlaşdırılır – “Android 16” versiyasında çoxpəncərəli rejim, tam funksiyalı masaüstü rejimi və çevik interfeys miqyaslandırılması kimi yeniliklər təqdim olunub. Bu dəyişikliklər “Android”i yalnız smartfonlar üçün deyil, həm də planşet və noutbuklar üçün universal platformaya çevirir.
Məqsədlər və perspektivlər
“ChromeOS” və “Android”in birləşməsi nəticəsində “Google” fərqli cihazlarda vahid istifadəçi təcrübəsi təqdim edən universal əməliyyat sistemi yaradacaq. Yeni platforma həm mobil, həm də noutbuk ssenarilərini nəzərə alacaq və “Google”un əməliyyat sistemini “iPad” və “macOS” qarşısında daha rəqabətqabiliyyətli edəcək.
Məlumata görə, “Google” yeni “Pixel” noutbuk hazırlayır. Bu cihaz birləşdirilmiş yeni əməliyyat sisteminin imkanlarını nümayiş etdirmək üçün nəzərdə tutulub. Cihaz “iPad” və “macOS” ilə işləyən kompüterlərə rəqib kimi təqdim olunacaq və istifadəçilərə həm iş, həm də əyləncə üçün güclü və çevik platforma təklif edəcək.
Tətbiqimizi yükləyə bilərsiniz
