Münaqişə zonalarında uşaqlara qarşı rekord səviyyədə zorakılıq qeydə alınıb – BMT

BMT 2024-cü ildə silahlı münaqişə zonalarında uşaqlara qarşı zorakılığın rekord səviyyəsini qeydə alıb.
Yeniavaz.com xəbər verir ki, bu barədə məlumat BMT baş katibinin 19 iyun 2025-ci ildə dərc edilmiş uşaqlar və silahlı münaqişələr üzrə hesabatında öz əksini tapıb.
2024-cü ildə silahlı münaqişə zonalarında uşaqlara qarşı 41 370 ağır qanun pozuntusu qeydə alınıb ki, bu da monitorinqlərin təxminən 30 il əvvəl başlanmasından bəri ən yüksək göstəricidir. Digər tərəfdən, 2023-cü illə müqayisədə pozuntuların sayı 25% artıb.
Ən çox insident İsrail və Fələstin ərazilərində (xüsusilə də Qəzza zolağında), həmçinin Konqo, Somali, Nigeriya və Haitidə qeydə alınıb.
2024-cü ildə ən çox rast gəlinən pozuntu uşaqların öldürülməsi və şikəst edilməsi (11 967 hadisə), daha sonra humanitar yardımdan imtina (7 906 hadisə) və uşaqların silahlı qruplara cəlb edilməsi və ya istifadəsi (7 402 hadisə) olub.
Həmçinin, məktəblərə hücumlar (44 faiz) və cinsi zorakılıq (34 faiz) artıb. Eyni zamanda bir neçə növ zorakılığa məruz qalan uşaqların sayında da artım olub.
BMT həmçinin qeyd edib ki, münaqişə tərəfləri ilə iddia edilən və ya faktiki mövcud olan əlaqələrə görə 3018 uşaq saxlanılıb.