“Rusiya generalı Yaroslav Moskalikin öldürülməsi Ukrayna xüsusi xidmət orqanlarının düzgün işi idi”.
Yeniavaz.com xəbər verir ki, bunu Ali Radanın Milli Təhlükəsizlik Komitəsinin katibi Roman Kostenko “Ukrainskaya pravda” nəşrinə müsahibəsində Moskalik də daxil olmaqla Rusiyanın yüksək rütbəli milli təhlükəsizlik funksionerlərinin “ləğv edilməsi” ilə bağlı nə deyə biləcəyi sualına cavab olaraq bildirib.
“Nə deyə bilərəm? Mən məmnunam ki, bu, bizim xüsusi xidmət orqanlarımızın düzgün işidir. Müharibəni yaxın gələcəkdə bitirsək belə, xüsusi xidmət orqanlarının işi yeni başlayacaq. Və bu istiqamət – mülki əhaliyə atəş açan, raketlər buraxan, təhlil edən, qərarlar verən, əmrlər verən cinayətkarların məhv edilməsi – bu, bizim xüsusi xidmət orqanlarımızın əsas vəzifəsi və Ukrayna Təhlükəsizlik Xidmətinin yaxın 10, 20, 30 ildə inkişafı olacaq – nə qədər ki, lazımdır”, - Kostenko bildirib.
Deputatın şəxsi fikrini söyləməsi, yoxsa Radanın Milli Təhlükəsizlik Komitəsinin rəsmi mövqeyini çatdırması tam aydın deyil. UTX deputatın açıqlamalarını şərh etməyib.
Qeyd edək ki, aprelin 28-də axşam Ukrayna Prezidenti Volodimir Zelenski Xarici Kəşfiyyat Xidmətinin rəhbərinin “Rusiya silahlı qüvvələrinin yüksək rütbəli komandanlığından şəxslərin ləğv edilməsi” ilə bağlı hesabatını eşitdiyini bildirib. O, Ukrayna kəşfiyyatı tərəfindən kimin “ləğv edildiyini” dəqiqləşdirməyib.
Xatırladaq ki, Rusiya Silahlı Qüvvələri Baş Qərargahının Baş Əməliyyat İdarəsinin rəis müavini, general-leytenant Yaroslav Moskalik aprelin 25-də Moskva vilayətinin Balaşixa şəhərində evinin yaxınlığında baş vermiş partlayış nəticəsində ölüb. Bomba generalın yaşadığı evin yanında dayanmış avtomobilə qoyulub və Moskalik yanından keçərkən partlayıb.
Partlayışdan bir gün sonra İqnat Kuzin Moskaliki öldürməkdə şübhəli bilinərək saxlanılıb. Rusiya FTX onu “Ukrayna xüsusi xidmət orqanlarının agenti” adlandırıb.
Tətbiqimizi yükləyə bilərsiniz
