Çin Ay torpağından kərpic istehsal edəcək


Çin dünyada Ay torpağından kərpic istehsal edən ilk maşını təqdim edib.
Yeniavaz.com
“Naked Science” nəşrinə istinadla xəbər verir ki, bu barədə Çinin Ayın kəşfiyyatı proqramının baş konstruktoru Vu Veyren Çin Milli Muzeyində Ayın kəşfiyyat proqramının iyirmi illiyi ilə bağlı sərginin açılışında məlumat verib.
Onun sözlərinə görə, Çin mühəndisləri tərəfindən hazırlanan və günəş enerjisi ilə işləyən maşın 1400-1500 dərəcə Selsi temperaturunda Ay reqolitini tamamilə əridə və sonra bu materialdan 3D çap texnologiyasından istifadə etməklə, müxtəlif ölçülü kərpiclər istehsal edə biləcək.
Ən əsası isə bu üsul Yerdən suyun və ya əlavə materialların daşınmasına ehtiyacı aradan qaldıracaq, həmçinin, resurslardan yerində istifadə etməyə imkan verəcək. Bu isə gələcəkdə Ayın tədqiqat stansiyasının tikintisi üçün mühüm addım olacaq.
Vu Veyren həmçinin bildirib ki, Çin 2026-cı ildə Ayın cənub qütbünün ətraf mühitini və resurslarını öyrənmək üçün “Chang'e-7” missiyasını göndərməyi planlaşdırır. 2028-ci ildə göndərilməsi planlaşdırılan “Chang'e-8” missiyası isə Ay resurslarının yerində istifadəsinə dair təcrübələr aparacaq.

DİGƏR XƏBƏRLƏR

Top