Şimali Karolina Universitetinin (ABŞ) yeni araşdırmasına əsasən, quş qripi sürətlə mutasiyaya uğrayır və insan sağlamlığı üçün daha böyük təhlükəyə çevrilə bilər.
Yeniavaz.com xəbər verir ki, alimlər quş qripi kimi tanınan H5N1 virusunun məməliləri yoluxdurmaq üçün getdikcə daha çox uyğunlaşdığını müəyyən edib.
ABŞ Xəstəliklərə Nəzarət və Qarşısının Alınması Mərkəzlərinin (CDC) məlumatına görə, bu virusa artıq inəklər və indiyə qədər azı 64 nəfər yoluxub. Mütəxəssislər xəbərdarlıq edirlər ki, virus mutasiyaya davam etdikcə insanlara yoluxma riski də artır.
Araşdırmanın aparıcı müəllifi Kolbi Ford bildirib ki, mövcud H5N1 peyvəndi (əvvəlki ştamma qarşı hazırlanmış) yeni variantlara qarşı daha az təsirli ola bilər. Həmmüəllif Den Canis isə qeyd edib ki, süni intellekt texnologiyası vasitəsilə böyük həcmdə məlumatı analiz edərək H5N1 virusunun amerikalı heyvandarlıq və təsərrüfat işçiləri də daxil olmaqla yeni ev sahiblərinə və regionlara yayılması kimi ciddi təhlükələrə qarşı hazırlıqlı olmaq mümkündür.
Tədqiqatçılar əlavə edirlər ki, virusun yeni ştammları artıq immunitet sistemindən yayınmaq qabiliyyətinə malikdir. Bu isə həm əvvəlki infeksiyaların, həm də peyvəndlərin verdiyi qorumanı zəiflədə bilər.
Hazırda quş qripi heyvanlar arasında pandemiya hesab olunur. Virus yüzlərlə quş və kiçik məməli növünə təsir göstərib. Son dövrlərdə isə bu xəstəlik daha böyük məməlilərdə, o cümlədən mal-qarada müşahidə olunur.
Alimlərin fikrincə, bu dəyişikliklər virusun insanlara ötürülmə ehtimalını artırır. Araşdırmanın nəticələri “EBioMedicine” jurnalında dərc olunub.
Bundan əlavə, hələ də ekspert rəyi mərhələsində olan başqa bir araşdırma, virusun əsas geninin dəyişdiyini üzə çıxarıb. Sözügedən gen virusun məməlilərin hüceyrələrinə daxil olmasına və immun müdafiədən yayınmasına şərait yaradır. Alimlər qeyd edirlər ki, sürətlə dəyişən viruslara qarşı effektiv mübarizə aparmaq üçün operativ elmi yanaşmalar vacibdir.
Tətbiqimizi yükləyə bilərsiniz
