Mərkəzi Bank notların faiz dərəcələrini artırıb

Ötən ilin eyni dövrü ilə müqayisədə bu ilin fevral ayında Mərkəzi Bankın notlarının faiz dərəcələrində artımlar qeydə alınıb.
Yeniavaz.com açıqlanan rəsmi göstəricilərə istinadən xəbər verir ki, ötən ilin fevral ayında 6,39% ilə təklif edilən 28 günlük notlar bu ilin fevral ayında 7,27% ilə təklif edilib.
Bundan başqa, ötən ilin eyni dövrü ilə müqayisədə bu ilin fevral ayında faiz dərəcələri 84 günlük notlar 6,8%-dən 7,8%-ə, 168 günlük notlar üzrə 6,8%-dən 8%-ə, 252 günlük notlar üzrə isə 6,8%-dən 8,2%-ə yüksəlib.
Mərkəzi Bankın dövriyyədə olan notlarının ümumi dəyəri isə son bir ildə 12 dəfə azalaraq 1 milyard 222,2 milyon manatdan 101,2 milyon manata düşüb.
Qeyd edək ki, notlar Mərkəzi Bank tərəfindən bir ilədək müddətə buraxılan adlı sənədsiz dövlət güzəştli qiymətli kağızlardır. Mərkəzi Bank müəyyən müddətə (28 gün, 84 gün, 168 gün və s.) notlar buraxır və onları banklara satır. Banklar bu notları alaraq Mərkəzi Banka pul verirlər və müddət bitəndə həmin pulu faizlə birlikdə geri alırlar. Notlar dövriyyədə olan pul kütləsinin tənzimlənməsi üçün nəzərdə tutulan pul siyasəti vasitəsidir. Adətən dövriyyədə çox pul olan zaman inflyasiya riskini azaltmaq üçün Mərkəzi Bank notlar buraxır, həmçinin faiz dərəcəsini yüksəldərək bazardakı pul kütləsini toplamağa çalışır.

Elnur Əli