İsrail Qəzzaya zərbələr endirdi – 11 nəfər öldü

İsrailin Qəzza zolağının cənubuna endirdiyi aviazərbələr və top atəşləri nəticəsində azı 11 nəfər ölüb.
Yeniavaz.com xəbər verir ki, bu barədə Qətərin “Əl-Cəzirə” telekanalı məlumat yayıb.
Bildirilib ki, İsrail qırıcıları anklavın cənubunda yerləşən Xan Yunis şəhərində yaşayış binalarına bir sıra zərbələr endirib. Hücum zamanı aralarında qadın və uşaqların da olduğu azı 10 nəfər həlak olub. Daha bir neçə nəfər yaralanıb.
Həmçinin bildirilib ki, İsrail ordusunun Xan Yunisin qərb ətraflarında qaçqınların məskunlaşdığı çadır şəhərciyini atəşə tutması nəticəsində azı bir nəfər ölüb, bir neçə nəfər yaralanıb.
Qeyd edək ki, martın 18-də İsrail ordusu Qəzza zolağında hərbi əməliyyatları bərpa edərək, anklav ərazisinə kütləvi zərbələr endirib və bununla da bu ilin yanvarında yaradılmış atəşkəsi pozub. İsrailin Baş naziri Benyamin Netanyahunun ofisi bunu Fələstinin HƏMAS hərəkatının danışıqlar zamanı vasitəçilər tərəfindən irəli sürülən təkliflərdən imtina etməsi ilə izah edərək, sektordakı əməliyyatın məqsədinin bütün girovları azad etmək olduğunu bildirib. HƏMAS hərbi əməliyyatların yenidən başlamasında İsrail və ABŞ-ni günahlandırır.