Boykotçulara “vətən xainləri” deyən şirkət rəhbəri milyonlarla dollarını itirdi

Türkiyədə boykot edən vətəndaşları “vətən xainləri” adlandıran “DBL Entertainment” şirkətinin sahibi Abdülkadir Özkan peşman olduğunu deyib.
Yeniavaz.com xəbər verir ki, bu barədə Özkan “Halk TV”yə açıqlama verib.
“Vergi ödəyən bir iş adamıyam, gənclərin çağırışı ilə ləğv edilən konsertlərə görə milyonlarla dollar itirdim. Kaş ki, o tviti heç atmasaydım. Min dəfə peşmanam”, - Özkan deyib.
Qeyd edək ki, CHP lideri Özgür Özelin boykot çağırışından sonra “DBL Entertainment”in sahibi sosial şəbəkə hesabında bəzi markaları boykot edən vətəndaşlara “bu açıq-aşkar kapital düşmənçiliyidir, vətənə xəyanətdir” deyib.
Reaksiyalardan sonra Özkanın təşkil etdiyi konsertlər bir-bir ləğv edilib.
“Mənə qarşı böyük haqsızlıq edilir, üç gündür sosial mediada linç edilirəm. Çox təəssüf edirəm. Əslində müxalifətçi mövqeyimə görə hakimiyyətə yaxın media qurumları olan Akit tərəfindən linç edilən biriyəm”, - Özkan deyib.
Xatırladaq ki, İstanbul Böyükşəhər Bələdiyyəsinin sədri Əkrəm İmamoğlunun həbsindən sonra CHP sədri Özgür Özəl “boykot” çağırışlarına başlayıb. Bu çağırışlardan sonra İstanbul Respublika Baş Prokurorluğu “nifrət, ayrı-seçkilik” və “ictimaiyyəti nifrət və düşmənçiliyə sövq etmək” ittihamları ilə istintaqa başlayıb.