Macarıstan Beynəlxalq Cinayət Məhkəməsindən çıxacaq

Macarıstan hökuməti Haaqa Beynəlxalq Cinayət Məhkəməsi ilə əməkdaşlığı dayandırmaq qərarına gəlib.
Yeniavaz.com xəbər verir ki, bu barədə Macarıstanın baş nazirinin aparatının rəhbəri Qergeli Qulyas məlumat yayıb.
“Hökumət Beynəlxalq Cinayət Məhkəməsindən çıxmaq barədə qərar qəbul edib. Konstitusiya və beynəlxalq hüquqi bazaya uyğun olaraq sazişə xitam verilməsi proseduru aprelin 3-də hökumət tərəfindən başlanacaq”, - aparat rəhbəri bildirib.
BCM-dən çıxma elanı HƏMAS hərəkatı ilə mübarizədə Macarıstanın dəstəyindən istifadə edən İsrailin Baş naziri Benyamin Netanyahunun Budapeştə səfəri ilə eyni vaxta təsadüf edir. Keçən ilin noyabrında Beynəlxalq Cinayət Məhkəməsi onun Fələstində hərbi cinayətlər və insanlığa qarşı cinayətlər ittihamı ilə həbsinə order verib.
Qeyd edək ki, o zaman Macarıstanın Baş naziri Viktor Orban qərarı “absurd və biabırçı” adlandırıb. O, israilli həmkarını Macarıstanın BCM-nin qərarına əməl etməyəcəyinə əmin edib.