Son 10 ildə ipoteka kreditinin orta aylıq ödənişi 54 faiz artıb

Bu ilin ilk 2 ayı ərzində Azərbaycanda fəaliyyət göstərən banklar tərəfindən 44,5 milyon manat məbləğində ipoteka krediti verilib.
Yeniavaz.com açıqlanan rəsmi məlumatlara istinadən xəbər verir ki, ötən ilin eyni dövrü ilə müqayisədə banklar tərəfindən verilən ipoteka kreditləri 7,7 milyon manat azalıb.
Məlumat üçün bildirək ki, fevral ayında banklar tərəfindən verilən ipoteka kreditinin orta məbləği 64 min 370 manat olub. İpoteka kreditləri orta hesabla 6,37% ilə 281,6 ay müddətinə ayrılıb. İpoteka kreditinin orta aylıq ödənişi isə 458,3 manat olub.
Müqayisə üçün qeyd edək ki, 10 il əvvəl – 2015-ci ilin fevral ayında banklar tərəfindən verilən ipoteka kreditinin orta məbləği 40 min 251 manat olub. 10 il əvvəl ipoteka kreditləri orta hesabla 6,77% ilə 279 ay müddətinə ayrılıb. İpoteka kreditinin orta aylıq ödənişi isə o dövrdə 297,1 manat olub.
Açıqlanan məlumatlardan da göründüyü kimi, son 10 ildə banklar tərəfindən verilən ipoteka kreditinin orta məbləği 60%, banklara geri ödənilən ipoteka kreditinin orta aylıq ödənişi isə 54,2% artıb.

Murad Məmmədov