Cümhuriyyət Xalq Partiyasının (CHP) prezidentliyə namizədi və İstanbul Böyükşəhər Bələdiyyəsinin (İBB) sədri Əkrəm İmamoğlunun həbsindən sonra sosial mediada edilən boykot çağırışları ilə bağlı başladılan istintaq çərçivəsində 16 nəfər haqqında həbs qərarı çıxarılıb.
Yeniavaz.com Türkiyə KİV-ə istinadla xəbər verir ki, hüquq-mühafizə orqanları “Şakir Paşa Ailəsi: Möcüzələr və Qalmaqallar” serialının baş rol ifaçısı, məşhur aktyor Cem Yiğit Üzümoğlu da daxil olmaqla 11 nəfəri saxlayıb.
İstanbul Respublika Baş Prokurorluğu onlara qarşı “nifrət və ayrı-seçkilik” və “ictimaiyyəti nifrət və düşmənçiliyə sövq etmək” ittihamları ilə cinayət işi açıb.
Üzümoğlu sosial media hesabında bu ifadələri işlədib: “Boykot Konstitusiyanın fikirləri ifadə etmək və yaymaq azadlığı çərçivəsində qiymətləndirilə bilən etiraz formasıdır. Buna Konstitusiyamızın 25, 26 və 34-cü maddələri ilə təminat verilir”.
Qalan 5 nəfərin axtarışları davam etdirilir.
Qeyd edək ki, İstanbul Böyükşəhər Bələdiyyəsinin sədri Əkrəm İmamoğlunun həbsindən sonra CHP sədri Özgür Özəl “boykot” çağırışlarına başlayıb. Bu çağırışlardan sonra İstanbul Respublika Baş Prokurorluğu “nifrət, ayrı-seçkilik” və “ictimaiyyəti nifrət və düşmənçiliyə sövq etmək” ittihamları ilə istintaqa başlayıb.
Tətbiqimizi yükləyə bilərsiniz
