Netanyahu BMC-nin həbs qərarına baxmayaraq, Macarıstana getdi

İsrailin Baş naziri Benyamin Netanyahu Macarıstana səfər edib.
Yeniavaz.com “Times of Israel” qəzetinə istinadla xəbər verir ki, bu barədə Macarıstanın müdafiə naziri Kriştof Salai-Bobrovnitski məlumat verib.
Məlumata görə, bu, Beynəlxalq Cinayət Məhkəməsinin (BMC) onun barəsində həbs qərarı çıxarmasından sonra Netanyahunun Avropaya ilk səfəridir.
Səfər Macarıstanın Baş naziri Viktor Orbanın dəvəti əsasında baş tutub.
Belə ki, Orban Qəzza zolağında hərbi cinayətlər törətdiyinə görə BMC-nin həbs qərarına baxmayaraq, Netanyahunu Macarıstana dəvət edib.
Macarıstan BCM-nin işində iştirak edən ölkə kimi Netanyahunu həbs etməyə borclu olsa da, Orban israilli həmkarına bunun baş verməyəcəyinə dair zəmanət verib.
Digər tərəfdən, diplomatik mənbələr bildiriblər ki, Orban hökuməti BCM ilə əlaqələri kəsmək qərarına gəlib. Ancaq bu, hələ ki, rəsmi olaraq öz təsdiqini tapmayıb.
Qeyd edək ki, iki günlük səfərdə Netanyahu macar həmkarı Viktor Orbanla danışıqlar aparacaq. Görüşdə Yaxın Şərqdəki vəziyyət və ikitərəfli əməkdaşlıq, o cümlədən iqtisadi sahədə inkişaf müzakirə ediləcək.
Xatırladaq ki, Haaqada yerləşən Beynəlxalq Cinayət Məhkəməsi (BCM) 2024-cü ilin noyabrında İsrailin Baş naziri Binyamin Netanyahu və keçmiş müdafiə naziri Yoav Qalantın Qəzza zolağında hərbi cinayətlər törətməkdə ittiham olunaraq həbs olunmasına order verib.