“Amazon” “TikTok”un ABŞ əməliyyatlarını Çinin “ByteDance” şirkətindən almaq üçün təklifi verib.
Yeniavaz.com xəbər verir ki, bu barədə “New York Times” öz mənbələrinə istinadən məlumat yayıb.
Bildirilib ki, təklif ABŞ-nin vitse-prezidenti J.D.Vensə və ölkənin ticarət naziri Hovard Lutnikə ünvanlanmış məktub şəklində göndərilib.
Qəzetin mənbələri qeyd edir ki, “TikTok”un mülkiyyət strukturunu dəyişdirmək üçün danışıqlarda iştirak edən müxtəlif tərəflər “Amazon”un təklifini ciddi qəbul etmirlər.
Şirkət şərh verməkdən imtina edib.
Nəşr qeyd edir ki, Tramp aprelin 2-də Ağ Evin yüksək rütbəli rəsmiləri ilə “TikTok”un gələcəyini müzakirə etmək üçün görüşməyi planlaşdırır.
Xatırladaq ki, 2024-cü ilin yazında ABŞ Konqresinin Nümayəndələr Palatası “TikTok” sosial şəbəkəsinin Çinli sahibi “ByteDance”dən ayrılmadığı təqdirdə ölkədə istifadəsini qadağan edən qanunu təsdiqləyib. Konqres üzvləri “TikTok”u milli təhlükəsizliyə təhdid hesab edirdilər. Apreldə keçmiş ABŞ prezidenti Co Bayden sənədi imzalayıb, yanvarda isə Trampın andiçmə mərasiminə bir neçə gün qalmış ABŞ Ali Məhkəməsi qanunu qüvvədə saxlayıb.
Yanvarın 20-də inauqurasiyasından sonra Tramp ABŞ baş prokuroruna qanunun icrasını 75 gün təxirə salmağı tapşıran sərəncam verib. Onun sözlərinə görə, “TikTok” səhmlərinin 50%-ni Amerika şirkətlərinə ötürsə, ABŞ-də fəaliyyətini davam etdirə bilər.
Tətbiqimizi yükləyə bilərsiniz
