ÜST-ün maliyyə vəsaitinin 45%-i çatışmır

Ümumdünya Səhiyyə Təşkilatı (ÜST) 2026-27-ci illər üçün azaldılmış 4,2 milyard dollarlıq büdcəsini maliyyələşdirmək üçün lazım olan təxminən 1,9 milyard dollar - 45% - çatışmazlıq ilə üzləşib.
Yeniavaz.com xəbər verir ki, bu barədə “Health Policy Watch” portalı ÜST əməkdaşlarının onlayn iclasında çıxış edən təşkilatın planlaşdırma mərkəzinin nümayəndəsi İmre Holloya istinadən məlumat yayıb.
İclasın digər iştirakçısı, ÜST-nin biznes əməliyyatları üzrə baş direktorunun köməkçisi Raul Tomasın sözlərinə görə, ABŞ-nin əvvəlki administrasiyası Co Baydenin prezidentlik müddəti başa çatana qədər 2024-cü il üçün təşkilata təxminən 130 milyon dollar yardım edə bilməyib. Qeyd olunur ki, tarixən ÜST-nin ən böyük donoru olan Vaşinqtonun imtinası təşkilatdakı böhranın əsas amilinə çevrilib. Beləliklə, 2022 və 2023-cü illərdə ABŞ sabit və könüllü töhfələr şəklində ona təxminən 1 milyard dollar ayırıb.
Qeyd edək ki, martın 30-da AFP ÜST-nin baş direktoru Tedros Adhanom Qebreyesusun təşkilat daxilində yayılan məktubuna istinadən xəbər verib ki, 2025-ci ildə ABŞ-nin təşkilatdan çıxması ilə əlaqədar maliyyənin dayandırılması səbəbindən ÜST 600 milyon dollara yaxın maliyyə çatışmazlığı ilə üzləşəcək. Bununla əlaqədar olaraq Qebreyesus ÜST-nin 2026-2027-ci illər üçün büdcəsini 21% azaldaraq 4,2 milyard dollara endirməyi təklif edib və işçilərin ixtisarının qaçılmaz olduğunu bildirib.
Xatırladaq ki, yanvarın 21-də ABŞ Prezidenti Donald Tramp digər ölkələrlə müqayisədə qeyri-mütənasib şəkildə yüksək töhfə verdiyini əsas gətirərək Birləşmiş Ştatların ÜST-dən çıxması haqqında sərəncam imzalayıb. Fevralın 3-də ABŞ administrasiyası beynəlxalq təşkilatların, o cümlədən ÜST-nin maliyyələşdirilməsinə xeyli miqdarda vəsait ayıran USAID-in fəaliyyətini faktiki olaraq dayandırıb. Martın 10-da ABŞ Dövlət Katibi, əvvəllər USAİD-in müvəqqəti rəhbəri vəzifəsinə təyin edilmiş Marko Rubio bəyan edib ki, altı həftəlik araşdırmadan sonra ABŞ hökuməti agentliyin proqramlarının 83%-ni rəsmi olaraq dayandırıb. Onun sözlərinə görə, ləğv edilmiş 5,2 min müqavilə çərçivəsində on milyardlarla dollar ABŞ-nin maraqlarına deyil, bəzi hallarda onun ziyanına xərclənib.