Ermənistanda cinayət işi açılan türkiyəli bloger nədə ittiham olunur?

Ermənistanda barəsində cinayət işi açılan türkiyəli bloger Ogün Özdəmirə qarşı ittihamlar məlum olub.
Yeniavaz.com Ermənistan KİV-ə istinadla xəbər verir ki, bu barədə Ermənistan İstintaq Komitəsinin mətbuat katibi Kima Avdalyan məlumat verib.
Məlumata görə, ona qarşı Cinayət Məcəlləsinin 422 maddəsinin 2-ci hissəsi ilə cinayət işi başlanıb.
Bloger kütləvi informasiya vasitələri və ya informasiya və telekommunikasiya texnologiyalarından istifadə etməklə hakimiyyətin ələ keçirilməsinə, ərazi bütövlüyünün pozulmasına və ya konstitusiya quruluşunun zorla dəyişdirilməsinə açıq çağırışlara görə ittiham olunur.
Qeyd edək ki, bir neçə gün əvvəl türkiyəli bloger Ogün Özdəmir İrəvandakı Respublika meydanından canlı yayım açaraq Azərbaycan xalqını Novruz bayramı münasibətilə təbrik edib. O, eyni zamanda, Azərbaycan torpağında olduğunu bildirib. Bundan sonra o, Türkiyə telekanallarından birinə müsahibə verib. Nəticədə, türkiyəli blogerin İrəvanda lentə aldığı videoların dərci ilə bağlı Ermənistanda cinayət işi açılıb. Bu barədə Ermənistan Milli Təhlükəsizlik Xidmətinin rəhbəri Armen Abazyan məlumat yayıb.