Xəbər verdiyimiz kimi, “Forbes” jurnalının 39-cu illik dünya milyarderləri reytinqi dərc olunub.
Yeniavaz.com xəbər verir ki, son bir il ərzində Rusiyadan olan milyarderlərin sayı 21 nəfər artaraq 146-ya çatıb. Onlardan 15-i ilk dəfə reytinqə daxil olub, daha 10 nəfər isə əvvəlki illərdə siyahıdan çıxsa da, yenidən reytinqə qayıdıb. Bununla yanaşı, dörd iş adamı siyahıdan çıxıb.
Milyarderlərin sayının artması əsasən yeni adlarla bağlıdır. Bu il Rusiyadan olan 15 yeni iş adamı siyahıya daxil olub. Onların arasında sıfırdan sərvət qazananlar, özəlləşdirmə dövründə varlananlar və varislər yer alır. Yeni milyarderlər kömür, nəqliyyat, mənzil tikintisi, maliyyə, İT, əczaçılıq, ticarət və enerji sahələrində fəaliyyət göstərirlər. Onların arasında ən varlı şəxs isə “Pharmasyntez” əczaçılıq şirkətinin sahibi Vikram Puniya olub. Onun sərvəti 2,1 milyard dollar dəyərində qiymətləndirilir.
Bundan əlavə, rusiyalı milyarderlərin ümumi sərvəti 625,5 milyard dollar həddinə yüksələrək yeni rekorda imza atıb. Əvvəlki maksimum göstərici 2021-ci ildə 606,2 milyard dollar olub.
Reytinqin lideri dəyişməz olaraq qalır. “Lukoyl”un səhmdarı, əslən Azərbaycandan olan Vahid Ələkbərov Rusiyanın ən varlı iş adamı ünvanını qoruyub saxlayıb. Onun sərvəti 28,7 milyard dollar olub. Vahid Ələkbərov “Severstal”ın sahibi Aleksey Mordaşovu (28,6 milyard dollar) və “Novateka” və “Sibura” şirkətlərinin səhmdarı Leonid Mixelsonu (28,4 milyard dollar) cüzi fərqlə geridə qoyub.
Qeyd edək ki, indiyədək Rusiya milyarderləri arasında yalnız beş nəfər bu reytinqdə bir neçə dəfə birinci yeri tutub. Onlar arasında Vladimir Lisin (dörd dəfə), Roman Abramoviç, Əlişir Usmanov və Leonid Mixelson (hər biri üç dəfə), Vladimir Potanin (iki dəfə) yer alır.
Murad Məmmədov
Tətbiqimizi yükləyə bilərsiniz
