“Ramazan bayramı günlərində İsrail Qəzza zolağına hücumlarını qəsdən artırıb”.
Yeniavaz.com xəbər verir ki, bu barədə Fələstinin HƏMAS hərəkatının yaydığı bəyanatda deyilir.
“Hərbi cinayətkar hökumət Ramazan bayramının ikinci günündə də Qəzza zolağında dinc əhaliyə qarşı soyqırımı davam etdirir. Son 48 saat ərzində Qəzzada ölənlərin sayı 80 nəfəri keçib, 300-dən çox insan yaralanıb”, - bəyanatda qeyd olunur.
“Xalqımız onları tabe etmək və hüquqlarını aradan qaldırmaq cəhdlərini rədd edir və öz torpaqlarını, prinsiplərini və azadlıq hüquqlarını qoruyub saxlamaqda, işğala son qoymaqda və öz müqəddəratını təyin etməkdə israrlıdır”, - təşkilatın “Telegram” kanalında dərc olunan məlumatda vurğulanıb.
Xatırladaq ki, martın 18-də İsrail ordusu Qəzza zolağında hərbi əməliyyatları bərpa edərək, anklav ərazisinə kütləvi zərbələr endirib və bununla da bu ilin yanvarında yaradılmış atəşkəsi pozub. İsrailin Baş naziri Benyamin Netanyahunun ofisi bunu HƏMAS-ın danışıqlar zamanı vasitəçilər və ABŞ prezidentinin xüsusi nümayəndəsi Stiven Uitkoff tərəfindən irəli sürülən təkliflərdən imtina etməsi ilə izah edib. Qeyd olunub ki, Qəzza zolağında əməliyyatın məqsədi bütün girovları azad etməkdir.
Tətbiqimizi yükləyə bilərsiniz
