Kaliforniya Universitetinin alimləri tərəfindən aparılan yeni araşdırmaya görə, cinsi yetkinlik və menopoz arasında qadınlarda estrogen cinsi hormonu ilə əlaqəli ola biləcək immun hüceyrələrində artım müşahidə olunur və onların bəzi yoluxucu xəstəliklərə kişilərə nisbətən daha az həssas olmasına şərait yaradır.
Yeniavaz.com xəbər verir ki, bu barədə “Journal of Experimental Medicine” jurnalında dərc olunan, cinsi xromosomların və cinsi hormonların müxtəlif yaş və cinslərdən olan sağlam insanların immun sisteminə təsiri ilə bağlı məqalədə deyilir.
Tədqiqatın baş müəllifi Elizabet Rosser deyir ki, bir çox qadın, COVID kimi infeksiyalara yoluxma riski yüksək olan kişilərə nisbətən “daha güclü” immun sisteminə malikdir.
“Bu fərqlərdə cinsi xromosomlar ( qadınlarda XX və kişilərdə XY ) kimi əsas cinsi hormonların, qadınlarda estrogen və kişilərdə testosteronun rol oynadığı güman edilir” , - deyə alim qeyd edib.
Hormonların və cinsin 31 müxtəlif növ immun hüceyrələrinin istehsalına necə təsir etdiyini öyrənmək üçün komanda 6 yaşdan 84 yaşa qədər 283 nəfərin qan nümunələrini təhlil edib.
“Nəticələr göstərdi ki , qadınlarda (XX xromosomları olan) kişilərə (XY xromosomları olan) nisbətən yaddaş B hüceyrələri kimi tanınan ağ qan hüceyrəsinin xüsusi növü daha yüksəkdir. İmmunitet sisteminin əsas komponenti olan yaddaş B hüceyrələri orqanizmin əvvəllər qarşılaşdığı infeksiyalarla mübarizədə çox təsirlidir”, - məqalədə deyilir.
Qeyd olunub ki, tədqiqatçılar bu gender fərqlərinin yalnız yetkinlik yaşına çatmış, lakin hələ menopoza girməmiş insanlarda (qadınlarda) müşahidə olunduğunu aşkar ediblər.
Tətbiqimizi yükləyə bilərsiniz
