Keçmiş səs mühəndisi Eminemin səsyazmalarını oğurlayıb – KİV

Rep ifaçısı Eminemin keçmiş səs mühəndisi musiqiçinin yayımlanmamış musiqi yazılarını oğurlayıb satmaqda ittiham olunub.
Yeniavaz.com xəbər verir ki, bu barədə “Variety” jurnalı məlumat yayıb.
Bildirilib ki, Dennis Streync 2007-ci ildən 2021-ci ilə qədər Miçiqanda səsyazma studiyasında işləyib və reperin bütün musiqi yazılarına çıxış əldə edib.
“Yayımlanmamış səs yazıları internetə sızdıqdan sonra FTB araşdırmaya başlayıb. Bu ilin yanvarında hüquq-mühafizə orqanlarının əməkdaşları Streyncin evində axtarış aparıb və rəqəmsal mediada Eminemin yayımlanmamış mahnılarını tapıblar ki, bunlardan 1999-2018-ci illər arasında lentə alınmış 25 mahnı internetdə peyda olub”, - jurnal yazır.
Qeyd olunub ki, təqsirləndirilən şəxs bir səs yazısı üçün təxminən 50 min dollar istəyib və əlində Eminemə məxsus 300-ə yaxın yayımlanmamış bəstə olduğunu bildirib.
Streynci sənətçinin müəllif hüquqlarını pozduğuna görə 5 ilə qədər həbs və 250 min dollar cərimə gözləyir. O, həmçinin ştatlar arasında oğurlanmış malların daşınmasında təqsirli bilinə bilər ki, bu ittihamla maksimum 10 il həbs cəzası nəzərdə tutulur.