Ortodont Viktoriya Radkonun sözlərinə görə, diş sağlamlığı təkcə ağız boşluğunun gigiyenasından deyil, həm də qidalanmadan asılıdır.
Yeniavaz.com xəbər verir ki, həkim bu barədə gazeta.ru-ya danışıb.
“Kalsium diş minasının əsas tikinti materialıdır, dentini gücləndirir və diş çürüməsinin qarşısını alır. Flüor və fosforla birlikdə bu element minanı kariyesə daha davamlı edir”, - Radko deyib.
Həkimin sözlərinə görə, süd məhsulları, xüsusilə sərt pendirlər, həmçinin balıq və qoz-fındıq kalsiumla zəngindir. Kalsiumun qebul edilməsindən məsul olan K vitamini ispanaq, soya və kartofdan əldə edilə bilər:
“Sağlam diş əti üçün metabolik prosesləri stimullaşdıran və iltihabın qarşısını alan C vitamini lazımdır. O, sitrus meyvələrində, çiyələklərdə və şirin bibərdə çox olur. Bununla belə, turşuluğu yüksək olan meyvələr minanı nazikləşdirə bilər. Buna görə də, onlardan istifadə etdikdən sonra ağzınızı su ilə yaxalamaq lazımdır.
Dəmir və B12 vitamini ağız mukozasının sağlamlığını dəstəkləyir, xora və iltihabın qarşısını alır. Bu elementlər ətdə çox olur.
Bundan əlavə, dişləri mexaniki təmizləyən, tüpürcək istehsalını təşviq edən və diş ətlərində qan dövranını yaxşılaşdıran məhsullar var. Alma, yerkökü, turp və kərəviz orqanizmi vitaminlərlə doyurmaqla yanaşı, həm də təbii diş fırçası kimi işləyir.
Braketlər taxarkən sərt, yapışqan və həddindən artıq şirin yeməklərdən uzaq durmalısınız. Lakin elaynerlərlə müalicə olunduqda, pəhriz məhdudiyyətləri yoxdur - yalnız onları taxmadan əvvəl dişlərinizi hərtərəfli təmizləmək vacibdir”.
Mütəxəssis xatırladır ki, düzgün qidalanma müntəzəm ağız gigiyenası ilə birlikdə dişləri sağlam saxlamaq və diş problemlərinin qarşısını almaq üçün ən yaxşı vasitədir.
Tətbiqimizi yükləyə bilərsiniz
