
Rusiya Dövlət Duması antiterror əməliyyatları çərçivəsində şəxsi avtomobillərdən istifadəyə icazə verən qanun qəbul edib.
Yeniavaz.com xəbər verir ki, bu barədə TASS agentliyi məlumat yayıb.
“Dövlət Duması plenar iclasda ikinci və üçüncü oxunuşda digər məsələlərlə yanaşı, antiterror əməliyyatı rejimi çərçivəsində terrorizmlə mübarizə tədbirlərini təmin etmək üçün vətəndaşlara məxsus nəqliyyatdan istifadəni nəzərdə tutan qanun layihəsini qəbul edib”, - deyə agentlik bildirib.
Dəyişikliklər “Terrorçuluğa qarşı mübarizə haqqında” qanuna əlavələr edib. Onlar 2024-cü ilin oktyabrında Dövlət Dumasına təqdim edilib və 2025-ci ilin yanvarında birinci oxunuşda qəbul edilib.
Qanun Federasiya Şurası tərəfindən də təsdiq edilib.
Hazırda qanunun qüvvəyə minməsi üçün prezident tərəfindən imzalanmalıdır.
Qanun layihəsinə əsasən terrorizmə qarşı əməliyyat rejiminin tətbiq olunduğu ərazilərdə mövcud qaydalara əsasən, əməliyyat müddətində mülkiyyət formasından asılı olmayaraq təşkilatlara, habelə fiziki şəxslərə məxsus nəqliyyat vasitələri və özüyeriyən maşınlardan təcili tibbi yardıma ehtiyacı olan şəxslərin tibb müəssisələrinə çatdırılması, habelə terror aktı törətməkdə şübhəli bilinən şəxsləri zərərsizləşdirmək üçün istifadə edilməsinə icazə verilir.
Yeni qaydalar vətəndaşlara və təşkilatlara məxsus nəqliyyatdan terrorla mübarizə fəaliyyətinin təmin edilməsi üçün istifadə oluna biləcəyini müəyyən edir.