“Azerspace-1”in sığortası “Paşa Sığorta”dan “Qala Sığorta”ya keçdi

Azərbaycan Respublikasının Kosmik Agentliyi (“Azərkosmos”) tərəfindən keçirilən tender müsabiqəsinin (Açıq tender) qalibi məlum olub.
Yeniavaz.com açıqlanan rəsmi məlumatlara istinadən bildirir ki, tenderin nəticəsinə əsasən “Qala Sığorta” ASC (VÖEN- 1700066901) bir il müddətində (01.02.2025 – 01.02.2026) “Azerspace-1” peykinin sığortalanması xidmətlərini həyata keçirəcək.
Qeyd olunan xidmət üçün “Azərkosmos” “Qala Sığorta”ya 1 milyon 377 min manat ödəyəcək. “Azerspace-1” peykinin dəyəri 53 milyon dollara (90,1 milyon manat) bərabərdir.
Qeyd edək ki, əvvəlki illərdə “Azerspace-1” peyki “Paşa Sığorta” ASC (VÖEN- 1400837161) tərəfindən sığorta olunub.
Belə ki, 01.02.2024 – 01.02.2025-ci il tarixlərində sığorta haqqı olaraq “Azərkosmos” “Paşa Sığorta”ya 1 milyon 436 min 500 manat (peykin dəyəri 66,5 miyon dollar), 01.02.2023 – 01.02.2024-cü il tarixlərində isə sığorta haqqı olaraq “Paşa Sığorta”ya 946 min 500 manat (peykin dəyəri 80 miyon dollar) ödəyib.
Onu da qeyd edək ki, “Azərkosmos” digər peykin – “Azerspace-2”nin sığortasını əvvəl “Qala Sığorta”ya həvalə etsə də, sonuncu dəfə tenderin qalibi “Paşa Sığorta” olub.
“Azərkosmos” dəyəri 81 milyon dollar olan “Azerspace-2”nin sığortası üçün 26.09.2024-26.09.2025-ci il tarixlərində “Paşa Sığorta”ya 1 milyon 581 min manat sığorta haqqı ödəyəcək. Bundan əvvəl isə “Azerspace-2”nin sığortası üçün “Qala Sığorta”ya 865 min 300 manat ödənilib.
Məlumat üçün bildirək ki, “Azərkosmos”un “Azerspace-1” və “Azerspace-2” peyklərindən başqa Yerin orbitində dəyəri 24,3 milyon avro olaraq qiymətləndirilən “Azersky” adlı müşahidə peyki də olub. Bu peyk sonuncu dəfə – 2022-ci ildə 517 min 900 manat sığorta haqqı ödənilərək “Paşa Sığorta” tərəfindən sığortalanıb. 2023-cü ilin aprel ayında peyk ilə əlaqə dayanıb və ehtimal olunur ki, peyk kiçik ölçülü kosmik tullantı və ya meteorit ilə toqquşub.

Elnur Əli