2024-cü il dekabrın 29-da səlahiyyət müddəti başa çatan Gürcüstanın beşinci prezidenti Salome Zurabişvili Arizona Dövlət Universitetinin nəzdində Con Makkeyn İnstitutunda Henri Kissincer təqaüdünə layiq görülüb.
Yeniavaz.com xəbər verir ki, bu barədə universitetin saytında məlumat verilib.
İnstitut xatırladıb ki, Zurabişvili Gürcüstanın ilk qadın xarici işlər naziri olub və prezident kimi Gürcüstanın Avropa İttifaqına və NATO-ya inteqrasiya yolunu qətiyyətlə müdafiə edib və demokratik islahatları dəstəkləyib, Kremldən köçürülən “xarici agentlər” haqqında qanuna veto qoyub:
“Makkeyn İnstitutunun təqaüdçüsü kimi Zurabişvili öz geniş diplomatik, liderlik və siyasi təcrübəsindən ölkəsində yeni seçkilər və demokratik inkişafa təkan vermək üçün istifadə edəcək”.
İnstitut Zurabişvilinin Gürcüstanı demokratik yola qaytarmaq üçün səylərə rəhbərlik etməyə davam edəcəyinə ümid etdiyini bildirib.
Zurabişvilinin özü Kissincer təqaüdünü almaqdan şərəf duyduğunu bildirib. Onun fikrincə, avtokrasiya və demokratiyalar arasında mübarizə dövründə cəbhədə vuruşan demokratik liderləri dəstəkləmək lazımdır.
Tətbiqimizi yükləyə bilərsiniz
