Qvardiola “Mançester Siti” ilə yeni müqavilə imzaladı

İspaniyalı baş məşqçi Pep Qvardiola İngiltərənin “Mançester Siti” futbol klubu ilə yeni müqavilə imzalayıb.
Yeniavaz.com xəbər verir ki, bu barədə ”The New York Times” qəzeti məlumat yayıb.
Məlumata görə, yeni müqavilə bir mövsüm üçün nəzərdə tutulub. Ancaq müqavilənin bir mövsüm də uzadılma ehtimalı var.
İspan mütəxəssislə hazırkı müqavilə 2025-ci ilin iyunun sonuna kimi nəzərdə tutulub.
Qeyd edək ki, Qvardiolanın 53 yaşı var. O, 2016/17 mövsümünün əvvəlindən “Mançester Siti”yə rəhbərlik edir. Onun rəhbərliyi altında komanda altı dəfə İngiltərə çempionu olub, iki dəfə İngiltərə Kubokunu, dörd dəfə Liqa Kubokunu, üç dəfə İngiltərə Superkubokunu qazanıb. 2023-cü ildə “Mançester Siti” Çempionlar Liqası, UEFA Superkuboku və Klublararası Dünya Çempionatının qalibi olub.
Qvardiola bundan əvvəl İspaniyanın “Barselona”sına və Almaniyanın “Bavariya”sına rəhbərlik edib. “Barselona” ilə o, üç dəfə İspaniya çempionu, İspaniya kuboku, Çempionlar Liqası, UEFA Superkuboku və klublararası dünya çempionatında iki dəfə qalib olub. “Bavariya” isə ispaniyalının rəhbərliyi altında üç dəfə Almaniya çempionu olub, iki dəfə ölkə kubokunun, bir dəfə UEFA Superkubokunun və bir dəfə klublararası dünya çempionatının qalibi olub.
Bir oyunçu kimi Qvardiola “Barselona” ilə altı dəfə İspaniya çempionu olub, iki dəfə ölkə kubokunu və UEFA Superkubokunu, hərəyə bir dəfə Avropa Kubokunu və Kubok Qalibləri Kubokunu qazanıb.
O, 1992-ci ildə İspaniya millisinin tərkibində olimpiya çempionu olub.
Qvardiola Beynəlxalq Futbol Federasiyası tərəfindən üç dəfə ilin məşqçisi mükafatını qazanıb.