Naxçıvan Ali Məclisinin deputatlarının nə qədər maaş alacağı məlum olub.
Yeniavaz.com xəbər verir ki, “Naxçıvan Muxtar Respublikası Ali Məclisi deputatının statusu haqqında” Qanununa edilən sonuncu dəyişikliyə əsasən, Naxçıvan Ali Məclisinin sədri 3 330 manat məbləğində aylıq vəzifə maaşı alacaq.
Ali Məclis sədrinin birinci müavini sədrin aylıq vəzifə maaşının 95 faizini (3 163 manat), sədrin müavini 90 faizini (2 997), komitə sədri 65 faizini (2 164 manat), komitə sədrinin müavini 60 faizi (1 998 manat), sıravi deputat isə 50 faizi (1 665 manat) miqdarında aylıq vəzifə maaşı alacaq.
Həmçinin Ali Məclisin sədri, onun birinci müavini və müavini hər ay vəzifə maaşlarının 2 misli, Ali Məclisin komitə sədrləri, onların müavinləri və Ali Məclisin deputatları hər ay vəzifə maaşlarının 1,5 misli həcmində vəzifə maaşına əlavə alırlar. Əlavələri də hesabladıqda Naxçıvan Ali Məclisinin sədri hər ay 9 990 manat, birinci müavini 9 489 manat, müavini 8 991 manat, komitə sədri 5 410 manat, komitə sədrinin müavini 4 995 manat, sıravi deputat isə 4 162 manat məbləğində vəsait alacaq.
Qanunda qeyd olunur ki, səlahiyyət müddəti qurtardıqdan sonra sabiq deputat işə düzələnədək 1 il müddətində hər ay deputatın aylıq vəzifə maaşının 80 faizi məbləğində qanunvericiliklə müəyyənləşdirilmiş qaydada müavinət alır.
Tətbiqimizi yükləyə bilərsiniz
