Ronaldo Poqbanı klubuna dəvət etdi

“Əl-Nəsr”in hücumçusu Kriştiano Ronaldo “Yuventus”un yarımmüdafiəçisi Pol Poqbanı komandasında görmək istədiyini bildirib.
Yeniavaz.com xəbər verir ki, bu barədə “TuttoJuve” məlumat yayıb.
Mənbə iddia edir ki, portuqaliyalı ulduz artıq fransızı Səudiyyə Ərəbistanı komandasına dəvət edib.
Qeyd edək ki, Ronaldo və Poqba 2021/22 mövsümündə “Mançester Yunayted”də birlikdə çıxış ediblər.
Xatırladaq ki, oktyabrın 7-də İdman Arbitraj Məhkəməsi “Yuventus”un futbolçusu Pol Poqbanın dopinq qadağasının 4 ildən 18 aya endirildiyini açıqlayıb. Qadağa 11 sentyabr 2023-cü il tarixindən hesablanır. Futbolçu 2025-ci ilin martından meydana çıxa biləcək.
Poqba Fransa millisinin tərkibində 2018-ci il dünya çempionu və 2016-cı il Avropa çempionatının gümüş mükafatçısıdır. O, dördqat A Seriya çempionu, iki dəfə İtaliya kubokunun qalibi və Avropa Liqasının qalibidir (2017).