Ərdoğan Putinə ad günü hədiyyəsi göndərdi

Türkiyə Prezidenti Rəcəb Tayyib Ərdoğan Rusiyalı həmkarı Vladimir Putinə ad günü münasibəti ilə hədiyyə göndərib.
Yeniavaz.com “RİA Novosti”yə istinadla xəbər verir ki, bunu Rusiya dövlət başçısının beynəlxalq məsələlər üzrə köməkçisi Yuri Uşakov deyib.
“Türkiyə Prezidenti dünənki telefon söhbətindən əvvəl xüsusi olaraq hədiyyə göndərib”, - o, jurnalistlərə bildirib.
Uşakov hədiyənin dəqiq nə olduğunu açıqlamayıb, ancaq Ərdoğanın Putinə “yaxşı türk hədiyyəsi” göndərdiyini vurğulayıb.
Eyni zamanda, hədiyyənin dövlət qulluqçuları üçün icazə verilən 3 min rubl daxilində olub-olmaması ilə bağlı suala cavab verən Uşakov bunun bir az daha baha olduğunu qeyd edib.
Dövlət başçısının köməkçisi başqa hədiyyələrin də olduğunu bildirib.
Qeyd edək ki, bir gün əvvəl Putinin 72 yaşı tamam olub. Ərdoğan rusiyalı həmkarını telefonla şəxsən təbrik edib.
Kremlin mətbuat xidmətindən verilən məlumata görə, söhbət zamanı dövlət başçıları ikitərəfli və beynəlxalq məsələləri də müzakirə ediblər.
Həmçinin, BRİKS-in Kazan sammiti zamanı Vladimir Putinlə Rəcəb Tayyib Ərdoğan arasında ayrıca görüşün keçirilməsi barədə razılıq təsdiqlənib.