Çempionlar Liqasının bütün iştirakçıları məlum oldu

UEFA Çempionlar Liqasının 2024/2025 mövsümü üçün əsas turnirinin bütün iştirakçıları məlum olub.
Yeniavaz.com xəbər verir ki, turnirə vəsiqə qazanan son iştirakçılar Xorvatiyanın “Dinamo Zaqreb”, Fransanın “Lill”, Slovakiyanın “Slovan” və Serbiyanın “Crvena Zvezda” klubları olub.
Bu gün – avqustun 29-da Monakoda turnirin püşkatma mərasimi keçiriləcək. Əsas mərhələnin görüşləri sentyabrın 17-də başlayacaq.
İlk “səbət”ə İspaniyanın “Real” və “Barselona”, İngiltərənin “Mançester Siti” və “Liverpul”, Almaniyanın “Bavariya”, “Borussiya” (Dortmund) və “Leypsiq”, Fransanın “Paris Sen-Jermen”, İtaliyanın “İnter” klubları daxil olacaq.
İkinci “səbət” Almaniyanın “Bayer”, İspaniyanın “Atletiko”, İtaliyanın “Atalanta”, “Yuventus” və “Milan”, Portuqaliyanın “Benfika”, İngiltərənin “Arsenal”, Belçikanın “Brügge” və Ukraynanın “Şaxtyor” klublarından ibarət olacaq.
Üçüncü “səbət”ə Hollandiyanın “Feyenord” və PSV, Portuqaliyanın “Sportinq”, Avstriyanın “Zalsburq”, Fransanın “Lill”, Xorvatiyanın “Dinamo” (Zaqreb), Serbiyanın “Crvena Zvezda”, İsveçrənin “Yanq Boyz”, Şotlandiyanın “Seltik”, klubları daxil olacaq.
Dördüncü “səbət”də isə Slovakiyanın “Slovan”, Fransanın “Monako” və “Brest”, Çexiyanın “Sparta”, İngiltərənin “Aston Villa”, İtaliyanın “Boloniya”, İspaniyanın “Jirona”, Almaniyanın “Ştutqart” və Avstriyanın “Şturm” klubları təmsil ediləcək.
2024/25 mövsümündən etibarən Çempionlar Liqasının əsas mərhələsinin formatı dəyişəcək. Belə ki, yeni mövsümdən turnirdə əvvəlki kimi 32 yox, 36 komanda iştirak edəcək.
Turnirin formatı da dəyişəcək. Əvvəllər klublar qruplara bölünürdüsə, indi 36 komandanın hamısı vahid sıralamada yer alacaq.
Klublar dördü evdə, dördü səfərdə olmaqla, müxtəlif komandalarla səkkiz oyun keçirəcək. Cütlər isə püşkatma nəticəsində müəyyənləşəcək. Ümumi cədvəldə ilk səkkiz yeri tutan komanda növbəti mərhələyə adlayacaq. 9-24-cü yerləri tutan klublar pley-offa vəsiqə qazanmaq uğrunda yarışacaq. Qalan komandalar isə Avropa Liqasında mübarizəni davam etdirmədən mövsümü başa vuracaqlar.
Qeyd edək ki, Çempionlar Liqasının hazırkı qalibi final matçında Almaniyanın “Borussiya Dortmund” klubuna 2:0 hesabı ilə qalib gələn İspaniyanın “Real Madrid” klubudur.