Poçettino ABŞ millisinə rəhbərlik edəcək – KİV

Argentinalı məşqçi Maurisio Poçettino ABŞ milli futbol komandasına rəhbərlik etməyə razılaşıb.
Yeniavaz.com xəbər verir ki, bu barədə “The Athletic” portalı məlumat yayıb.
Məlumata görə, komandanın əvvəlki məşqçisi amerikalı Qreqt Berxalter son Amerika Kubokunda ABŞ komandasını qrupdan çıxara bilmədiyi üçün komandadan uzaqlaşdırılıb.
Argentinalı mütəxəssis əvvəllər milli komandaları idarə etməyib. O, 2023/24 mövsümündə İngiltərə çempionatının turnir cədvəlində altıncı yeri tutan İngiltərənin “Çelsi” klubuna rəhbərlik edib. Təcrübəli məşqçi komandanı İngiltərə Liqa Kubokunun finalına çıxarıb. Komanda burada əlavə vaxtda “Liverpul” klubuna 0:1 hesabı ilə uduzub. “Çelsi” həmçinin onun rəhbərliyi ilə ölkə kubokunun yarımfinalında da oynayıb. Yarımfinalda komanda ölkə çempionu “Mançester Siti”yə 0:1 hesabı ilə məğlub olub.
Qeyd edək ki, Poçettino əvvəllər Fransanın PSJ, İngiltərənin “Tottenhem” və “Sauthempton” və İspaniyanın “Espanyol” klublarına da rəhbərlik edib.