““Windows” qəzasından sonra tam bərpa bir neçə həftə çəkə bilər” – KİV

“Qlobal “Windows” problemindən təsirlənmiş bütün sistemləri tam bərpa etmək bir neçə həftə çəkə bilər”.
Yeniavaz.com xəbər verir ki, bu barədə “The Guardian” məlumat yayıb.
“Cümə günü axşam saatlarında bütün dünyada xaosa səbəb olan rəqəmsal fasilədən sonra xidmətlər yenidən onlayn olmağa başladı, lakin tam bərpa həftələr çəkə bilər”, - məlumatda deyilir.
Nəşr qeyd edib ki, ekspertlərin fikrincə, bir çox şirkətlər belə fövqəladə hallar zamanı tələb olunan sürətli tədbirlərə hazır deyillər:
“Şirkətlər müvafiq qorunma yaratmaq və vacib məlumatların ehtiyat nüsxələrini saxlamaqla məşğul olmasalar, bu cür uğursuzluqlar hələ də təkrarlana bilər”.
Xatırladaq ki, ötən gün “Windows”da qlobal xəta baş verib. Baş verən xəta ABŞ, Avstraliya, Hindistan, Böyük Britaniya və Avropa İttifaqında bir neçə bank və şirkətlərə təsir edib. Xəta Amerika aviaşirkətlərinin ən azı 130 reysinin ləğvinə və 200-dən çox reysinin gecikməsinə səbəb olub.