“SOCAR Türkiyə” İsrailə xam neftin satılması ilə bağlı ittihamlara cavab verib.
Yeniavaz.com xəbər verir ki, şirkət yaydığı açıqlamada bununla əlaqədar ittihamları əsassız adlandırıb.
“Son vaxtlar regionda baş verən geosiyasi dəyişikliklər fonunda SOCAR Türkiyə və qrup şirkətləri bir müddətdir bəzi təxribatçılar tərəfindən həm sosial şəbəkələr üzərindən, həm də fiziki hərəkətlərlə hücuma məruz qalıb. Bu təxribatçı qruplar guya İsrailə xam neft satdığıma dair əsassız ittihamlar irəli sürərək sosial şəbəkələrdə təxribat xarakterli paylaşımlar edir, eyni zamanda, şirkət binasına, əməkdaşlarımızın təhlükəsizliyini təhlükə altına qoyaraq hücumlar edirlər. İstanbuldakı Baş ofisimizə 12 mart, 29 may, 31 may və 2 iyun tarixlərində, Bursadakı “Bursagaz” ofis binamıza 24 may tarixində həyata keçirilən və şiddət səviyyəsi artan təxribatçı hərəkətlərin davam etdirilməsi şirkətimizin işçilərinin həyat təhlükəsizliyi üçün təhlükə yaradır.
Ana şirkətimiz olan Azərbaycan Dövlət Neft Şirkəti SOCAR-ın irəli sürdüyü vizyona uyğun olaraq, biz bütün fəaliyyətimizi beynəlxalq biznes müqavilələri çərçivəsində həyata keçiririk. Bu kontekstdə SOCAR-ın hazırda İsrailə xam neft satması ilə bağlı ittihamlar əsassızdır və məqsədyönlü şəkildə ictimaiyyəti çaşdırmaqdır. Dünya neft satış bazarının özünəməxsus xüsusiyyətləri var və hasil edilən xam neft ticarət şirkətləri tərəfindən və ya bu şirkətlər vasitəsilə satılır. Təchizat şirkətlərinin xam nefti hansı ölkələrə daşıdıqlarına və ya hansı məqsədlər üçün istifadə etdiklərinə nəzarət etmək və ya müdaxilə etmək imkanı yoxdur. Bu çərçivədə SOCAR digər neft şirkətləri kimi tədarük etdiyi məhsulların ticarətini də müvafiq ticarət şirkətləri ilə satış əlaqələri çərçivəsində həyata keçirir. Lakin bazarda fəaliyyət göstərən ticarət şirkətləri ilə davam edən normal satış münasibətlərimiz çərçivəsində SOCAR-dan tədarük edilən xam neftin ticarət şirkətləri tərəfindən hansı ölkələrə və hansı məqsədlərlə daşınmasına nəzarət etmək və ya müdaxilə etmək mümkün deyil.
SOCAR Türkiyə olaraq sərmayələrimiz və əməkdaşlıqlarımız Türkiyə ilə Azərbaycan arasındakı möhkəm qardaşlıq və dostluq bağlarına, strateji müttəfiqliyə və xalqımızın qarşılıqlı maraqlarına uyğun formalaşır. Türkiyədə fəaliyyətə başladığımız on altı il ərzində təxminən 18,3 milyard dollar sərmayə ilə, müxtəlif vilayətlərdə 5 min 600 birbaşa və on mindən çox dolayı işçisi olan qrup şirkətlərimiz neft və təbii qaz sahəsində fəaliyyət göstərən və strateji STAR neft emalı zavodu və TANAP kimi həyata keçirdiyimiz meqa layihələrlə Türkiyənin ən böyük xarici investoru və layihələri ilə ən böyük inteqrasiya olunmuş sənaye qrupuyuz. Türkiyədəki mövcud sərmayələrimizi yeni investisiyalarla genişləndirmək üçün səylərimiz davam edir. Xüsusilə fəaliyyət göstərdiyimiz bölgələrdə mövcud enerji kəsiri, yaratdığımız iqtisadi dəyər və məşğulluq, eləcə də həyata keçirdiyimiz bir çox korporativ sosial məsuliyyət layihələrinin bağlanmasına töhfəmizlə sosial fayda üçün bütün gücümüzlə çalışırıq. Yaşadığımız zəlzələ faciəsində ilk gündən həm pulsuz yanacaq dəstəyi, həm də əsas ehtiyacların bölgəyə çatdırılması baxımından qardaş türk xalqının yanında olduq və etməyə də davam edirik. Türkiyənin müxtəlif əyalətlərində qurduğumuz on bir məktəbdə on mindən çox şagirdə təhsil dəstəyi veririk. Sosial məsuliyyətimizi dərk edərək təhsil, ətraf mühit və sosial sahələrdə fəaliyyətimizi davam etdiririk.
Bir qrup təxribatçı tərəfindən irəli sürülən əsassız ittihamları qətiyyən qəbul etməsək də, ictimai rəyi manipulyasiya etmək və yüz illik qardaşlıq bağımıza xələl gətirmək məqsədi daşıyan bu əsassız diskussiya və hərəkətlərə məhəl qoyulmamasını xahiş edirik. Türk və Azərbaycan xalqlarının ortaq maraqları və rifahı üçün bundan sonra da çalışacağıq. Şirkət şüarımızda qeyd etdiyimiz kimi, biz həmişə bir yerdəyik. Biz güclüyük”, - açıqlamada deyilir.
Tətbiqimizi yükləyə bilərsiniz
