Türkiyə Prezidenti Rəcəb Tayyib Ərdoğan martın 31-nə təyin edilmiş bələdiyyə seçkilərindən sonra Rusiya Prezidenti Vladimir Putin və Misir Prezidenti Əbdülfəttah əs-Sisinin səfərlərinə ümid edir.
Yeniavaz.com xəbər verir ki, bu barədə “A Haber” telekanalı məlumat yayıb.
Telekanalın məlumatına görə, Putin və əs-Sisinin səfərləri apreldə baş tuta bilər. May ayında Ərdoğan Yunanıstanın Baş naziri Kiriakos Mitsotakisi qəbul etməyi planlaşdırır. O, Ərdoğanın ötən il Afinaya səfərindən sonra cavab səfəri edəcək. Bundan başqa, Türkiyə liderinin 12 ildən sonra İraqa ilk səfəri aprelin sonuna planlaşdırılıb.
Ərdoğan Türkiyə bələdiyyə seçkilərindən sonra Putinin gözlənilən səfərini çərşənbə axşamı ənənəvi iftar süfrəsində açıqlayıb. Türkiyə lideri burada xarici səfirlər qarşısında çıxış edib.
“A Haber” qeyd edir ki, bu səfər baş tutsa, liderlər regional vəziyyəti, Qara dənizdəki taxıl dəhlizini, Ukrayna münaqişəsindəki vəziyyəti, enerji mövzularını və Yaxın Şərq müharibəsini müzakirə edəcəklər.
Qeyd edək ki, daha əvvəl Rusiya dövlət başçısının mətbuat katibi Dmitri Peskov Putinin Türkiyəyə səfərinin dəqiq tarixlərinin hələ müəyyən edilmədiyini və diplomatik kanallar vasitəsilə tezliklə razılaşdırılacağını bildirib.
Tətbiqimizi yükləyə bilərsiniz
