Baş planı müzakirələrə səbəb olan yaşayış sahəsində 4,7 milyona kommunikasiya şəbəkəsi qurulur

Mənzil İnşaatı Dövlət Agentliyinin (MİDA) tabeliyində fəaliyyət göstərən “MİDA” MMC tərəfindən keçirilən tender müsabiqəsinin qalibi məlum olub.
Yeniavaz.com xəbər verir ki, tenderin qalibi “İntegras” MMC (VÖEN – 1305249991) olub.
Tender müsabiqəsinin şərtlərinə görə, “İntegras” MMC Cəbrayıl şəhərində 7,87 ha torpaq sahəsində inşa olunan yaşayış kompleksində sahədaxili kommunikasiya (elektrik enerjisi, su-kanalizasiya və rabitə) şəbəkəsinin tikintisi işlərini həyata keçirəcək və qarşılığında 4 milyon 704 min 654 manat 1 qəpik alacaq.
Məlumat üçün bildirək ki, tenderi keçirən “MİDA” MMC 2016-cı ildə yaradılıb. Nizamnamə kapitalı 10 milyon manat olan “MİDA”nın direktoru Qida Təhlükəsizliyi Agentliyinin (AQTA) sədri Qoşqar Təhməzlinin qardaşı Fərhad Təhməzlidir.
Tenderin qalibi olan “İntegras” MMC-nin hüquqi ünvanı Yasamal rayonu, Abdulla Şaiq, ev 214, m. 99-da yerləşir. Nizamnamə kapitalı 50 manat olan ““İntegras” MMC 2 noyabr 2017-ci il tarixində dövlət qeydiyyatına alınıb. MMC-nin qanuni təmsilçisi Həsənova Məhsəti Hüseynalı qızıdır.
“İntegras” MMC bu günə kimi ancaq “Azərişıq” ASC-nin keçirdiyi tender müsabiqələrində qalib olub.
Onu da qeyd edək ki, abadlıq və yaşıllaşdırılması nəzərdə tutulan 7,87 ha torpaq sahəsində inşa olunan yaşayış kompleksində tikilən hündürmərtəbəli binaların bir-birinə yaxın və nizamsız şəkildə inşa olunması sosial şəbəkə istifadəçiləri tərəfindən tənqid olunub.

“Azərişıq” Baba Rzayevin qohumlarına məxsus zavodu “işıqlandıracaq” - 616 min manat ayrıldı...

Elnur Əli