Nərgiz Absalamova şahid qismində dindirildi – Yenilənib

Jurnalist Nərgiz Absalamova da şahid qismində BŞBPİ-də dindirilib.
Yeniavaz.com xəbər verir ki, bu barədə jurnalist özü danışıb.
Absalamova bildirib ki, ona “Abzas Media”nın direktoru Ülvi Həsənli və baş redaktoru Sevinc Vaqifqızının saxlanılması ilə bağlı suallar verilib:
“Dedilər Ülvinin ofisində pul tapılması ilə bağlı çağırılmışam. Amma suallar heç o yöndə deyildi. Suallar daha çox “Abzas”ın fəaliyyətilə bağlı idi. Çox detal vermirəm, əfsus ki, istintaq sirri olduğuna görə. Amma ordakı suallar artıq hər şeyi açıqlayırdı”.

***18:05
Jurnalist Sahilə Aslanova şahid qismində BŞBPİ-də dindirilib.
Yeniavaz.com xəbər verir ki, bu barədə jurnalist özü məlumat verib.
Aslanova bildirib ki, “Abzas Media”nın direktoru Ülvi Həsənli və baş redaktoru Sevinc Vaqifqızının saxlanılması ilə bağlı ona suallar verilib:
“Detalları, təbii ki, verə bilmirəm. Məhəmməd Kekalovla bağlı soruşdular ki, tanıyıram ya yox. Dedim ki, belə bir şəxs tanımıram”.
Jurnalist bildirdi ki, idarədə ona qarşı heç bir kobud rəftar olmayıb.
Həmçinin qeyd edib ki, Nərgiz Absalamova ilə ayrı otaqlarda olublar, fərlqi müstəntiqlər işlə məşğul olur.

***12:35
Jurnalistlər Nərgiz Absalamova və Sahilə Aslanova “Abzas Media”nın direktoru Ülvi Həsənli və baş redaktoru Sevinc Vaqifqızına qarşı açılan cinayət işi ilə bağlı şahid qismində Bakı Şəhər Baş Polis İdarəsinə çağırılıb.
Yeniavaz.com xəbər verir ki, onlara bu gün ərzində İdarəyə gəlmək üçün ayrı-ayrı vaxtlar təyin olunub.
Xatırladaq ki, “Abzas Media”nın direktoru Ülvi Həsənli noyabrın 20-də səhər saat 5 radələrində evinin qarşısında taksiyə minərkən saxlanılıb.
Günorta isə “AbzasMedia”nın ofisində axtarış aparılıb.
Axtarış nəticəsində ofisdən 40 min avro pul tapıldığı iddia olunub.
Mətbuat orqanının baş redaktoru Sevinc Vaqifqızı isə noyabrın 21-nə keçən gecə saat 2 radələrində İstanbuldan gələn təyyarə Bakıda yerə enən kimi saxlanılıb.
Daha sonra gecə saat 3 radələrində onun yaşadığı evdə axtarış aparılıb. Ancaq mənzildən heç nə tapılmadığı bildirilir.
Onların hər ikisinə qarşı Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə ittiham irəli sürülüb.
Ötən axşam Xətai Rayon Məhkəməsində hakim Sülhanə Hacıyevanın sədrliyi ilə keçirilən məhkəmə prosesində Ülvi Həsənli barəsində 4 ay, Sevinc Vaqifqızı haqqında isə 3 ay 29 günlük həbs qətimkan tədbiri seçilib.
Sevinc Vaqifqızı hakimə deyib ki, Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə irəli sürülmüş ittiham saxtadır. O bildirib ki, həbsinin səbəbi “AbzasMedia”dakı jurnalist fəaliyyəti, hakimiyyətdəkilərin korrupsiya əməlləri barədə araşdırmalarıdır. Ülvi Həsənli də məhkəmədə qaçaqmalçılıq ittihamının absurd olduğunu, ofisdən tapıldığı iddia olunan pulların orada axtarış aparanların özlərinin atdığını deyib.
Həmçinin ictimai fəal, “Abzas Media”nın direktor müavini Məhəmməd Kekalov da saxlanılıb. Daxili İşlər Nazirliyinin Mətbuat xidmətinin əməkdaşı Nurlan Əliyev onun müvafiq cinayət işi üzrə məsuliyyətə cəlb edildiyini, araşdırma aparıldığını bildirib. DİN-inmətbuat katibi Elşad Hacıyev isə onun Cinayət Məcəlləsinin 206.3.2-ci (Qabaqcadan əlbir olan bir qrup şəxs tərəfindən törədildikdə qaçalmalçılıq) maddəsilə ittiham olunduğunu açıqlayıb.