Prokuror “AzGold” rəhbərinə 11 il iş istədi - 2 milyonluq dələduzluq

İki milyondan çox pulu dələduzluq yolu ilə ələ keçirməkdə ittiham edilən “AzGold” MMC-nin rəhbəri Müşfiq Muxtarovun növbəti məhkəmə iclası keçirilib.
Yeniavaz.com bakupost.az-a istinadən xəbər verir ki, Bakı Ağır Cinayətlər Məhkəməsində hakim Mirzə Xankişiyevin sədrliyi ilə baş tutan məhkəmə prosesində Müşfiq Muxtarova qarşı Cinayət Məcəlləsinin 178.3.2 (külli miqdarda dələduzluq etmə), 308 və 310 maddələri ilə ittiham irəli sürülüb.
Dövlət ittihamçısı şirkət rəhbərinə 11 il iş istəyib.
İyulun 6-da hakim Mirzə Xankişiyevin sədrliyi ilə növbəti məhkəmə prosesi keçiriləcək.
Qeyd edək ki, Baş prokuror yanında Korrupsiyaya qarşı Mübarizə Baş İdarəsi tərəfindən vətəndaş müraciəti əsasında aparılan araşdırma zamanı Müşfiq Muxtarovun 2012-2014-cü illər ərzində özü üçün qanunsuz üstünlük əldə etmək məqsədilə qulluq səlahiyyətlərindən sui-istifadə etməklə maliyyə vəziyyətinə dair bilə-bilə yalan məlumatlar təqdim etdiyi “AccessBank” QSC-nin “Göyçay” filialı ilə aralarında bağlanmış kredit müqavilələri əsasında ümumilikdə 700 min ABŞ dolları məbləğində qanunsuz kredit vəsaitini götürərək, “AccessBank” QSC-yə külli miqdarda ziyan vurmasına, kredit vəsaiti üzrə həmin dövrün məzənnəsi ilə cəmi 572 min 377 manat məbləğində pul vəsaitini qəsdən ödəməməklə, “AccessBank” QSC-nin normal fəaliyyətinin pozulmasında ifadə olunan hüquqlarına və qanuni mənafelərinə ağır nəticələrə səbəb olan mühüm zərər vurmasına əsaslı şübhələr müəyyən edilib.
Həmçinin, Müşfiq Muxtarovun özgə əmlakını ələ keçirmək məqsədilə 2014-cü ilin iyul ayında bir neçə vətəndaşı qızıl külçələrinin ölkə ərazisinə gətirilib-satılması biznesinə sərmayə yatırıb qazanc əldə etmək adı ilə aldatmaqla 3 şəxsə məxsus cəmi 2 milyon 19 min manat məbləğində pul vəsaitini dələduzluq yolu ilə ələ keçirməkdə ittiham edilir.